Simone Inzaghi leh Inter an inṭhen

Inter Milan leh an manager Simone Inzaghi te chu an inṭhen - Champions League final-a Paris Saint Germain an hneh loh aṭanga hun rei vak loah, inhriatthiam tawnna in an thawhhona hi an ti tawp a ni.

Kum 49 mi Inzaghi hian kum 2021 aṭang khan Serie A club hi a enkawl ṭan, season liam taah khan Serie A nomawi an kalw lai chu Napoli lakah an hloh; Coppa Italia leh UCL pawh beisei viau mah se a hmawr an bawk fuh ta lo bawk.

Italian manager Inzaghi chuan, "Kum li chhung Inter Milan enkawl hna ka thawk tawh a, tunah chuan mangṭha tih a lo hun ta. Hna ka thawh lai khan club tan theihna zawng zawngin ka bei ṭhin.

"Nerazzurri fans ho ka ngai dawn, hun harsa leh khirh ka tawh lai pawhin ka tan a ding tlat ṭhin a, hlawhtlinna kan chanin kan hlim em em bawk, kei chuan ka theihnghilh tawh dawn lo," tiin a sawi.

Serie A champion nih pui thei Inzaghi hian duhthusama ṭhain a hun tawp hmang lo mah se, season hmasa lamah a lo hlawhtling tawh a, a sulhnute chu sawi nep theih a ni dawn lo, a hmun ruak hnawh khah pawh a awlsam lo ang.

Inter Milan manager hlui hian khawi lam nge a pan dawn tih chian a la ni lo. Mahse, khawthlang chanchinbu rintlak tak tak te chuan Saudi Arabian club Al-Hilal an an sawizawm a, sum tam zawk hlawh turin a kal a nih pawhin a mak lo ang.

Inter president Giuseppe Marotta chuan, "Club tana a hnathawh leh thil tih zawng zawngte avangin Simone Inzaghi chungah lawmthu ka sawi. A rilru leh ngaihtuahna zawng zawng club tan a hmang ṭhin a, a inpekna a sang em em bawk.

"Hlawhtlinna chan tumin theihtawp kan chhuah ho a, ṭhenkhatah hlawhtling mah ila ṭhenkhatah erawh vanduai zawka kan ṭanna pawh a awm, football huangah chuan kan duh leh beisei ang vek hian thil a kal thei bik lo a ni," tiin a sawi.

Serie A nomawi bakah Coppa Italia nomawi pahnih leh Italian Super Cup a lakpui a, UCL final vawi hnih lut bawkin Manchester City leh PSG lakah a vanduai zawkah an ṭang thung.

Inter Milan hian FIFA Club World Cup an khel dawn a, inelna hi June 14 - July 13 chhungin United States-ah neih a ni dawn, tournament an hmachhawn hma ngeiin manager thar an neih hman chu a rinawm.