French Open: Sabalenka hmachhawn tur Swiatek

Hmeichhe tennis player ṭha bik Aryna Sabalenka leh Iga Swiatek te chu French Open final luh inchuhin an inkhel dawn, world number 1 Sabalenka tan champion lai hi awlsam taka paltlang theih a ni lo ang.

Thawhlehni tlai khan Court Phillippe Chatrier-ah Sabalenka hian Olympic champion Zheng Qinwen chu 7-6 (7-3), 6-3 in a hneh hram a, atan hna a awlsam lo.

Quarterfinal inkhel dangah Swiatek erawh a chak awlsam - Polish nula Swiatek hian Elina Svitolina chu 6-1, 7-5 in a hneh ve thung a, clay court inelna lianah hian kum dang ang bawkin a kaltluang rih hle.

Belarus nula Sabalenka hian nikum October khan Swiatek lak aṭangin world number 1 nihna a chhuhsak a, a hnu lamah a pe kir duh tawh rih lo; nomawi mai bakah ranking point an inchuh chho na hle.

Player pahnih te ṭum 12 an intawna vawi riat chak thei Swiatek chuan, "Aryna hian court hrang hranga khelh dan hran a nei zel a, eng hmunah pawh ṭha takin a khel thei tih a fiah nawn ngun ta hle tih pawh ka hria.

"Ani paltlang tur chuan a tir aṭangin tihsual neih tlem a pawimawh dawn a, inkhel hautak bik hmachhawn turin ka inpeih a ngai. Chutihrualin, tennis kan khel a nih chuan hetianga chona lian hmachhawn hi chu ka nuam tih zawng a ni," a ti.

Season hmasa chawhnu lamah khan Swiatek hian thla khat chhung hremna a tawk a, a rilru leh taksa na takin a nghawng. Hremna a hman zawh hnuah inkhel leh tawh mah se hlawhtlin a la harsat, tun inelna an khelh lai hi atan ngaiawh leh theihna remchang a ni ang.

French Open bikah chuan Swiatek hi hmeichhe player dang chunga leng a ni, vawi li ngawt a champion tawh. Kuminah hian seeded pangana ni mah se player dang tana hmachhawn châkawm lo ber a nih tho a rinawm.

Swiatek hi hneh thei tur an awm a nih chuan Sabalenka hi a nih ngei a rinawm thung. Season kal laiah Sabalenka hian nomawi pathum a chawi tawh, chung zingah chuan Madrid Open pawh a tel, clay court-ah ṭha takin a inkhel thei a ni tih a takin a lantir a ni.

World number 1 Sabalenka chuan, "Harsa takin Zheng ka hneh hram, a nihna takah chuan set hmasa zawk kha engtin nge ka lak theih pawh ka hrethiam lo. Ka match lehpek chu a hautak zual zawk ngei ang," tiin a sawi.