European champion Spain hmaah France

UEFA Nations League semifinal hnuhnung zawk chu zanin dar 12:30 hian MHPArena, Stuttgart-ah khelh a ni dawn a, European champion Spain leh France te an inkhel ang. Nizan khan Germany leh Portugal ten Allianz Arena-ah semifinal hmasa zawk an khel a, result kan hre hman lo.

Spain leh France te hi 2020-21 Nations League final-ah an inhmachhawn tawh a, Euro 2024 semifinal-ah an inhmachhawn leh bawk a, La Roja-in hnehna an chang ve ve. Les Bleus-in tun ṭuma hian phuba lak an tum dawn a, coach tawnhriat nei ṭha Didier Deschamps hoin tho chhuah ngei an tum ang.

Chutihrualin Champions League final-ah France club ṭha ber PSG an inlan a, Luis Enrique hote hi an champion zui avangin player ṭha ṭhenkhatin team traning an zawm tlai. Hei vang hian Deschamps tan hna a tam sawt dawn a, team angin an la inpeih lo ve thei bawk.

Spain coach Luis de La Fuente chuan, "Kan theihna zawng zawng kan chhuah dawn. Nations League champion nawn thei hmasa ber nih kan tum dawn," tiin a sawi. La Roja hi tun hnaia ram inelnaa team ṭha ber zinga mi an ni a, mimal langsar vut awm loin team anga an thawh hona a ṭha hle.

Mimal langsar an awm lo han tih hian Lamine Yamal an kawl tih hriat a ṭha a, Barcelona midfielder hi kum 17 mi chauh ni mah se khawvel huapa player ṭha ber zinga mi a ni tawh. Tlarhmaah kum 20 mi Nico Williams, kum 27 mi Dani Olmo leh kum 32 mi Alvaro Morata te nen attacking game hmuhnawm tak an khel thei dawn.

Tlarhnung lamah Bournemouth aṭanga Real Madrid zawmtu Dean Huijsen bakah Barcelona rawlthar duhawm kum 18 mi Pau Cubarsi te nen an inkawp dawn a, goalkeeper tawnhriat nei ṭha Unai Simon te nen tlarhnung lam pawh a khawng ṭha viau.

France lamah Kylian Mbappe a awm a, Real Madrid striker hian goal khung hnem mah se tun season-ah UEFA Super Cup leh FIFA Intercontinental Cup nomawi chauh an chawi avangin Nations League nomawi chawi châkna a nei lian lehzual ang.

Ousmane Dembele-a'n UCL-ah PSG a champion pui a, zaninah bul a ṭan a rinawm lo zawk. Chutihrualin Dembele tan Nations League hi a pawimawh a, France hi a champion pui a nih chuan Ballon d'Or dawng thei turin a dinhmun a sawt ang. Les Bleus hian PSG player Lucas Hernandez, Warren Zaire-Emery, Bradley Barcola, Desire Doue leh Randal Kolo Muani te an awm a, team tichaktu vek an ni.

France hian tlarhmaah Lyon forward Rayan Cherki an nei a, ani hi Manchester City leh Liverpool ten an hel mek. English club ṭha pahnih duh player chu ṭha viau tura ngaih a ni. Zanin inkhel ti en châkawmtu a ni thei ang. France coach Didier Deschamps pawhin an ram team kum 13 a enkawl tling tawh a, FIFA World Cup thleng a enkawl dawn. Deschamps hian World Cup nomawi hial a chawi tawh a, a hun tawp ṭha taka hmang turin Nations League a ngai pawimawh ang.