Dan rual loh Carlos Alcaraz

French Open champion lai Carlos Alcaraz chu hma lam panin chak takin a kal zel - Spanish star hian Tommy Paul hnehin semifinal a lut, a hmabak chu Lorenzo Musetti a ni dawn.

Seeded pahnihna Alcaraz tan hna harsa a la awm lo - set hmasa pahnih la turin minute 53 chauh a mamawh, game khat bak a hloh lo. Set hnuhnung berah Paul hi rawn kang ve hret mah se, 6-0, 6-1, 6-4 in Alcaraz a tlang ta tho.

Nadal sulnu

French Open leh Rafael Nadal an inzawm tlat a, sawi hran theih a ni lo - Nadal chawlh hnuah amah ang bawka Spanish player Alcaraz a rawn lang, ani hian clay court inelna lian chu a thunun chho mek.

A zawna a vawi thum nan Roland Garros semifinal a lut ta a, Grand Slam a khelh tawh zingah chuan tun ṭum hi semifinal thleng tura set a hloh tlem ṭum a ni mek, a nomawi humhim turin kawng dik a zawh.

Kum 22 mi Alcaraz chuan, "Rilru leh taksa zawng zawng engkim a inpeih vek chuan inkhelh hi a nuam a, tun ṭumah pawh khan ka duh ang vekin thil a thleng ni berin ka hria, sawisel tur hran ka nei lo.

"Grand Slam a ni a, chumai bakah quarterfinal a ni tawh bawk. Tournament boruak sang leh a tawp lam tawhah set hloh loa chak theih chu a lawmawm. Tommy nen kan inkhel fo tawh, vawi hnih chu min hneh tawh, tun ṭumah erawh ka vannei," a ti.

Clay court inelna lian berah hian match 32 a chak tling ta chiah a, vawi hnih a tlawm tawh thung. Nadal nen khaikhin chi la ni lo mah se, tuna tennis khel lai player ho zingah chuan Nadal sulhnu han zui thei tura beisei awm ber a ni mek.

Hmabak Musetti

French Open champion lai Alcaraz hian an match lehpekah chuan Lorenzo Musetti a hmachhawn dawn - Italian tlangval Musetti hian inkhel dangah Frances Tiafoe chu 6-2, 4-6, 7-5, 6-2 a hnehin quarterfinal a paltlang ve bawk a ni.

American player ten Paris khawpuiah hian sulhnu an nei ṭha ngai lo - tun hnai kum 22 chhungin Tiafoe hi American tlangval zinga French Open quarterfinal lut thei awmchhun a ni a, ani pawh a zinkawng a tawp zui nghal.

Seeded pariatna Musetti chuan, "Nikum khan pa ka ni a, chu chuan mawhphurhna sang zawk min pe. Chhungkua mai bakah khelmualah thlengin tun hma zawng aiin ka puitling tawh zawk hle niah ka ngai.

"Chhungkua a hun hman a hlu a, chumi bakah training neih pawhih phurna a zual duh hle. Phur leh nuamti taka training ka neih rah chhuah chu tunah hian a takin a lo lang," tiin a sawi a, a hmabak hlen zel a tum.

A hmabak erawh a hautak dawn - French Open bikah hian Rafael Nadal (vawi 10) leh Gustavo Kuerten (2001) te chauh hi mipa player zingah nomawi a zawna humhim thei an ni a, player pathumna nih tum mek Alcaraz chu Musetti hmaah hian a ding dawn a ni.