Messi-a'n an ram team a zawm

Thla sarih zet a liam hnuah Lionel Messi chu Argentina tan a inlan ve leh dawn ta. Inter Miami captain hian an ram team a zawm fel a, training pawh a nei pangngai chho leh tawh a ni.

Messi-a'n ram tana match a khelh hnuhnung ber chu nikum November kha a ni a, kumin March-ah khan hliam vangin La Albiceleste tan hian a khel thei lo. Tunah chuan FIFA World Cup South American qualifier-ah Chile leh Colombia a hmachhawn ang.

Kum 37 mi Messi hi Major League Soccer (MLS) Player of th Week atan thlan hlim a ni. Columbus Crew lakah goal hnih a khung bakah a ṭhiante khung tur vawi thum a siamsak a, a khel ṭha chho leh mek.

Argentina hi 2026 FIFA World Cup khel turin an tling chiang tawh, mahse football inelna ngaihhlut ber hi nakkum maia khelh tur a ni leh tawh a, hei vang hian Messi leh a ṭhiante ten team boruak ṭha neih a hun.

Messi a inlan dawn lai hian Alexis Mac Allister, Enzo Fernandez leh Leandro Paredes te erawh ram tan an inkhel dawn rih lo. Champions League final-a chak lo Inter Milan captain Lautaro Martinez erawhin vawiin hian an ram team a zawm ang.

World champion hian June 6, Zirtawpni zing dar 6:30-ah Chile an tlawh dawn; June 11, Nilaini zingah Colombia an mikhual ve leh thung dawn a ni.

South America ram 10 ten World Cup qualifier an khel a, vawi hnih ṭheuh an inkhelh kual hnuah a sang paruk chu an tling nghal dawn; pasarihna pawhin playoff an la khel thei dawn a, ram pasarih tan kawng a inhawng tihna a ni.