Cunha hnung zuitu tur Mbeumo

Manchester United chuan Wolves aṭangin Brazil forward Matheus Cunha an lakluh thu chu June 1, Pathianni khan an puang a, Brentford striker Bryan Mbeumo an dawr leh mek.

Ruben Amorim-a hote hian season liam ta khan Premier League-ah match 38 aṭangin goal 44 chauh an khung a, goal khung tlem lamah pangana an ni. Manto taka an lakluh Rasmus Hojlund leh Joshua Zirkzee ten goal li leh goal thum chauh an khung.

Hei vang hian nipui bazarah pawh Man United hian goal khung thei tur player an zawng nghal a, an biak fel hmasak pawh Cunha a ni. English club hian kum 26 mi Cunha hi a release clause £62.5mtd-in an la chhuak a, Old Trafford-ah kum nga daih contract ziakin kum khat dang pawhsei dan a awm.

Man United hian Cunha chungchangah Wolves nen inremna nei tawh mah se document tihfel ngai a la awm a, Brazil tana a inlan zawhah tihfel a ni ang. Carlo Ancelotti-a'n Cunha hi ram tana khel turin a ko a, Brazil hian June 6, Zirtawpni zing dar 4:30-ah Ecuador an hmachhawn ang a, June 11, Nilaini zing dar 6:15-ah Paraguay nen an inkhel leh ang.

United hian Cunha ringawt an la lungawi lo a, Mbeumo an dawr leh mek. Mahse, Cameroon striker hian release clause a nei lo a, Bees-ah kum khat contract a la nei thung. Chutihrualin United hian season liam taa Bees tan league-a goal 20 khungtu player hi kaluh theih an inbeisei. Kum 25 mi Mbeumo hi no. 9 ni chiah lo mah se attacking-a position hrang hranga a khelh theihna hi Amorim-a duhna chhan niin a lang.

Man United tan chanchin lawmawm dang a awm a, captain Bruno Fernandes chuan Saudi Pro League club Al Hilal aṭanga sawmna ṭha bik chu a hnawl niin an sawi. Portuguese midfielder hian Europe-a inelna sanga khelh a la duh.