CYMA Football 2025-in Coach hlutna a tisang sawt dawn

LBS Suzuki 22nd Inter Branch YMA Football 2025 chu football coach tan chanchin lawmawm a ni a, tualchhung football coach ṭha pahnih Lalsangzuala Hmar leh Lalbiaksanga Colney ten an team enkawl final an thlenpui avangin tualchhung inelnaah coach licence nei hlutna a sang sawt ang.

Seeded zingah Republic Veng an tel lo a, champion rinkai panga zingah an tel pha kher lo ang. Mahse, Repubic Vengin AFC B Licence coach nei, Lalsangzuala Hmar an la lut. Sanga pui tur hian AIFF D Licence nei coach pathum Francis Rambeiseia, Lalzarzova leh Vanlalnghaka te an awm bawk.

Republic Veng hian champion pui theih tur player an kawl a, chutihrualin anni aia squad chhah ṭha an la tam. Nomawi an chawi theih nan coach Sanga hnathawh a ropui hle. BVT-in nomawi chawi ta lo mah se game nghet ṭha tak an khel a, AIFF D Licence coach Lalbiaksanga Colney hnathawh a ni.

Tun dinhmuna Mizo coach ṭha ber zinga mi BS-a hian a naute game nghet ṭha tak a khelhpui a, coach ṭha enkawl team danglamna a rawn pholang. Durtlang head coach Malsawmdawngliana leh assistant coach R. Lalawmkima (Tea) ten AIFF D Licence an nei ve ve a, chutihrualin Armed Veng South erawhin an licence coach ni loin an veng football hrechiangtu an enkawltir thung.

CYMA Football a zo a, MPL-in a chhunzawm dawn. Mizorama football inelna sang berah erawh club enkawl turin AFC C Licence nei tal neih a ngai thung. Chutihrualin Inter Village Football emaw CYMA Football emaw a awm chho leh ang a, team enkawl turin veng ṭhahnem takin licence coach (active) an duh fur ang.