MPL12 tinungtu tur Dinthar FC

Mizoram chhunga football inelna sang ber Mizoram Premier League season 12 chu July 17, Ningani aṭangin khelh ṭan a ni dawn. Dinthar FC hian thla liam ta May 13, Thawhlehni khan an facebook page kaltlangin MPL12-a an rawn kir tur thu an puang a, MPL a nung sawt ang.

Dinthar FC hian MPL coach atan an player hlui Laldampuia an la lut a, Dampuia hian MPL10-ah khan Chanmari FC chu final a thlenpui. Maimawms enkawl turin a puitling tawh a, inelna hmachhawn turin RG Stadium-ah training an ṭan tawh bawk.

Sialhawk Express

Dinthar FC tana chanchin lawmawm chu R. Laldanmawia an la kir a, Sialhawk Express hian CYMA Football-ah MPL khel turin a la ṭha tawk tih a pholang. Sialhawkin quaterfinal an thlen theih nan player pawimawh a ni a, Republic Veng laka a goal khung phei chu inelna neih zawh taka goal mawi ber zinga mi a ni.

Danmawia hi MPL1-ah khan best player a ni a, Chanmari West FC leh Chanmari FC tana a khelh hnuah Aizawl FC zawmin I League nomawi hial a chawi. ISL club Hyderabad leh NE United tan a khel tawh a, hei hian a theihna sanzia a pholang.

Nomawi chawi thei bik player a ni a, Mizoram junior team a champion pui bakah Red Ribbon Football-ah Durtlang leh Chanmari a champion pui a, NECS Cup-ah Ramhlun South a champion pui tawh bawk.

Ramchhana an la lut

Dinthar FC hian Swami Vivekananda U20 Men's NFC 2025-a Mizoram captain Joel B. Lalramchhana chu Aizawl FC aṭangin an la lut a, a tawnhriat leh thiamna hi Maimawms tan a ṭangkai dawn.

Ramchhana hian FC Venghnuaiah hming a rawn chher a, goalkeeping a ṭhat bakah ball pet a thiam avangin hman ṭangkaina tur a tam. Zobawk tlangval hi danglamna thlen theitu a ni a, tlarhnung tan ngaih ṭha taka khelh theihna tur a ni ang.

Team an din

Dampuia kaihhruaina hnuaiah Dinthar FC-in team an din ṭan a, Danmawia leh Ramchhana bakah MPL-a hming chher tawh leh theihna nei sang player an la lut nual.

Hnahthial winger Lalruatsanga (Tutu-a) chu Khawzawl Vengthar aṭangin an la lut a, Tutu hian kum 2023 khan Dinthar FC tan a khel tawh. COE Tata Trust chhuak Electric Veng forward Samuel Lawmsiamkima an la lut a, Sialhawk defender rinrawl Lalramhluna (Lalbawiha) an la nghet tawh bawk.

Mizo midfielder talent nei ṭha zinga mi Lalremtluanga an la lut a, ani hi coach Dampuia hman thiam sa a ni. Lunglei Zobawk aṭangin LH Lalchawimawia, Selesih winger Ricky Lalramnghaka, Kawrtethawveng rawlthar Zodika Khiangte leh Hnahthial defender Vanlalhmachhuana te an la lut bawk.

Dinthar hian an vengchhung player Michael K. Lalhriatpuia, Lallawmkima, C. Lalnunthara leh Lallawmawma te an ziak lut a, heng player-te hi team tan an ṭangkai thei ang.