Djokovic, Sinner leh Zverev an chak

Chawlhkar hmasa mai khan Novak Djokovic chuan mellung pawimawh a phun - Geneva Open champion niin tennis a khelh hun chhungin nomawi 100 a chawi tling a, tunah chuan French Open bika match 100 chak tling thei record a siam leh ta.

Thawhṭanni zan khan Court Philippe-Chatrier-ah Djokovic hi a inlan a, atan match pawimawh a nih avangin ngaihventu pawh an tam. Inkhel hmuhnawm takah Cameron Norrie chu 6-2, 6-3, 6-2 a hnehin quarterfinal a lut.

Serbian star Djokovic bakah hian world number1 Jannik Sinner leh, champion tura rinkai zinga mi Alexander Zverev te pawhin last 16 an paltlang a, nomawi inchuh boruak a sang chho zel dawn a ni.

Rafael Nadal-a'n tennis a chawlhsan hnua French Open an khelh lehna hmasa ber a ni a, clay court thununtu ber a awm tawh loh avangin midang tan hming chher theihna remchang a inhawng chho mek a ni.

Match 100

Kum 38 mi a nih tawh avangin Djokovic hi a vanglai a pel tawh, season hmasa aṭang khan result a nei ṭha tawk lo bawk. A nihna takah chuan French Open khelh hma kha chuan rinkai tak a ni lem lo.

Mahse, Roland-Garros an khel ta chiah a, tawnhriat nei ṭha a nihna kan hmu chho zel. Norrie erawhin French Open last 16 a khelh vawi khatna chauh niin, atan a awlsam lo - hun pawimawh laiah Djokovic zawk zel a che fuh.

Grand Slam vawi 24 champion tawh Djokovic chuan, "Ka ball vuak leh taksa chet vel danah chuan ka inkhel a nghet tawk hleah ka ngai. Tun aia ṭha zawk khan ka la khel thei tih erawh ka pawm.

"Set nga khelh turah set hmasa pathum kan la tlang thei a nih hi chuan kan khel ṭha hle tihna a ni a, match lehpekah kan khel ṭha chhunzawm thei ang em tih erawh a pawimawh lai chu a ni zawk," tiin a sawi.

Hmabak Zverev

French Open vawi thum champion tawh Djokovic hian quarterfinal-ah chuan Alexander Zverev a hmachhawn ang. Zverev hian inkhel dangah Tallon Griekspoor chu 6-4, 3-0 in a lo hneh ve thung.

Set hnihna an khelh zawh hmain tualchhung tlangval Griekspoor hi a hliam a, a inkhel zui thei tawh lo. Last 16 match khel hah lutuk loin Zverev hi a tlang tihna a ni a, quarterfinal atan thahrui a khek thei a ni.

German tlangval Zverev chuan, "Engtik lai mahin Novak hi dah hniam theih a ni lo, a sulhnu aṭang hian mi bik a nihzia chu inhrilh nawn kan ngai lo, chuvangin tun ṭumah pawh hian champion rinkai ber zingah a tel.

"Kan intawn hnuhnung kha a la rei lo, chuvangin a harsa dawn tih ka hria," a ti. Season tir lam khan Australian Open semifinal-ah khan an intawng a, hliam vangin Djokovic hi a inkhel tluan ve thei ta lo zawk a ni.

Sinner a chak

Jannik Sinner pawhin kawng dik a zawh chhunzawm - Grand Slam quarterfinal vawi 11 a luhna ni turin seeded 17-na Andrey Rublev chu 6-1, 6-3, 6-4 a hnehina thiam zual pariat zingah a inhlangkai ve bawk.

World number 1 Sinner hian a tir aṭangin inkhel a thunun tluan thei, a khingpui service vawi nga ngawt a chhuhsak laiin ama service chu a hum vek thung, harsatna lian tham tawk loin Russian tlangval a hneh.

Kum 23 mi Sinner chuan, "Mak tak maiin a tir aṭang khan thil a kal fuh em em vek a, ka tan chuan chanchin lawmawm tak a ni. Kar hmasa aṭangin inelna kan nei tawh a, a tawp lama set hloh loa chak theih hi a hlu," tiin a sawi.

Italian tlangval Sinner hian Australian Open nomawi pahnih leh US Open title pakhat a la tawh - French Open bikah chuan season hmasa khan semifinal lutin a thlen san ber a la ni, tun ṭumah hian Jiri Lehecka a hmachhawn leh ang.