Ronaldo-a'n nomawi a chawi belh dawn em?

UEFA Nations League semifinal chu zanin dar 12:30 hian Germany leh Portugal ten Allianz Arena-ah an khel dawn a, inkhel hi Sony Sports bakah online-a en duh tan Sony Liv-ah a en theih ang. Semifinal hnuhnung zawk hi June 5, Ningani zan zan dar 12:30 hian Spain leh France ten MHPArena, Stuttgart-ah an khel leh ang.

Germany hi inelna thlengtu an nih avangin champion tur pawhin an buk a rit a, mah se Portugal hi Cristiano Ronaldo telna a nih avangin mipui ngaihven ber tur an ni. Ronaldo hian a hmalam hun tur a tihchian loh avangin Nations League-a chet ṭhat hi contract thar ṭha zawk emaw club thar zawnna kawngah emaw a pawimawh ang.

Inelna kalphung

UEFA-in ram inelnain ngaihhlut a hlawh theih nan friendly match aiah Nations League inelna a buatsaih a, inelna hian a kum telin ngaihven a hlawh chho. Nations League-ah hian Europe ram 54-te chu an ṭhat dan a zirin league paliah ṭhendarh an ni a, league A-a khel chinte an champion thei.

League-ah hian ram 16 awmin group paliah ṭhendarh an ni a, group tina a sang pahnih zelin playoff hi an khel a, nikum November thla khan quarterfinal an khel tawh. Tun ṭumah hian ram langsar pali Portugal, France, Germany leh Spain ten semifinal an lut a, anni hian quarterfinal-ah Denmark, Croatia, Italy leh Netherlands te an hneh a ni.

Inelna hi vawi li neih a nihna a ni a, Portugal, France leh Spain te an champion tawh a, tun ṭuma playoff khel zingah Germany chiah hi an la champion lo.

A hmuhnawm dawn

Julian Nagelsmann-a'n an ramah nomawi chawi ngei a duh dawn a, goalkeeper Andre Ter Stegen a dam leh tawh avangin bul a rawn ṭan leh thei tawh ang. Jamal Musiala a inhliam avangin Liverpool nena sawi zawm Florian Wirtz chu en bik hlawh tur a ni dawn.

Portugal lamah Cristiano Ronaldo a tel a, Rafael Leão leh Bernardo Silva nen an inkawp hmuh a châkawm. Mit la ber tur erawh PSG champion puitu midfielder Vitinha a ni a, Ronaldo nen an inkawp rem em tih zaninah a hriat ang.