LA FC-in CWC khel dawn

Major League Soccer club Los Angeles FC chu FIFA Club World Cup khel turin an inpetkai a, playoff-ah Club America chu 2-1 in an hneh.

Mexican club, Club America hian LA FC player hlui Brian Rodriguez-a penalty hmangin goal hmahruai an khung a, mahse, Los Angeles tan Igor Jesus chuan minute 89-naah si phurh a sut.

Extra time khelh a ngai zui a, Oliver Giroud chuan minute 115-naah Denis Bouanga tan siamin, Gabon international hian goal-ah a chantir - goal dang a lut tawh lo a, 2-1 in LA FC an chak.

Kum 38 mi Giroud hi minute 75-naah bench aṭangin a lut a, France tana World Cup nomawi chawi tawh striker a luh hnuah MLS club inkhel a nung sawt - Giroud bakah hian Tottenham Hotspur keeper hlui Hugo Lloris chu LA FC tan hian a khel bawk.

Club World Cup-ah hian CONCACAF Champions League 2023 champion Club Leon chu inlan tur an ni a, mahse, FIFA chuan Leon hi CWC-a inlan tur tho Mexican club Pachuca nen neitu thuhmun an nih avangin inlan a rem ti lo.

Leon hi Court of Arbitration for Sport-ah zualko mah se, CAS chuan FIFA thutlukna hi a kaltlangpui a, hmun ruak pakhat chu playoff hmangin zawn a nih phah. LA FC hi Club Leon-in Champions League final-a an hneh niin, playoff khel tura thlan an ni a, Club America-in chance an neih chhan hi CONCACAF confederation ranking-a Club Leon hnuaia ranking sang ber an nih vang a ni.