Kelleher-a'n Brentford a zawm dawn

Liverpool goalkeeper Caoimhin Kelleher chuan Brentford a zawm dawn a, Reds chuan Brentford dawrna an pawm - pound maktaduai 12.5-in Irish keeper hi an hralh ang a, a khelh ṭhat dan a zirin a man hi £18mtd thleng a sang chho thei ang.

Brentford hian an keeper Mark Flekken chu Bayer Leverkusen lakah an chân dawn a, Dutch keeper hi £8mtd-in an hralh dawn. Kum 31 mi keeper thlak nan Kelleher an bia a, he thuziak i chhiar meuh chuan an in la lut fel tawh hialin a rinawm.

Kum 26 mi Kelleher hian Liverpool-ah kum khat dang khel turin contract a la nei a, mahse, Reds-in Alisson an neih avangin first choice nih a beiseiawm lo.

Hei mai a ni lo - season hmasa ṭan dawn khan Liverpool hian Valencia keeper Giorgi Mamardashvili chu tun season-a lakluh turin inremna an lo neihpui tawh a, £29mtd man keeper a awm dawn bawk avangin Kelleher tan chhuah mai hi a finthlak.

Republic of Ireland keeper hian Reds tan kum nga liam taah khan a match hmasa ber khelin, Premier League-ah match 25 a inlansak a, cup game 42 khelin, Premier League nomawi pahnih, Champions League, FA Cup, League Cup (2) leh UEFA Super Cup-ah a champion pui - season hman zawh takah khan inelna hrang hrangah match 20 a khel.

Brentford-in beiseina sang tak nen an la lut dawn a, Flekken hmun ruak hnawhkhah a awlsam lo ang. Netherlands international Flekken hian May 2023 khan Brentford hi SC Freiburg aṭangin a pan a, a man hi £11mtd a ni.

Premier League a pan hma season hnih chhungin, Bundesliga-ah ani aia clean sheet ngah zawk keeper an awm lo a, EPL-a season hnih a awm chhungin match hnih tih loh chu league match a khel vek a, vawi 14 clean sheets neiin, assist vawi thum a nei.