Verstappen hrem niah Piastri a chak

Pathianni zana tlan zawh tak Spanish Grand Prix-ah Oscar Piastri a chak ber a, champion lai Max Verstappen erawhin hremna tawkin a tawpah chuan 10-na a ni phak ta chauh a ni.

Circuit de Barcelona-Catalunya-a intlansiakah, season hmang ṭha tak McLaren team bawk an chungnung. Piastri hnungah hian a teammate Lando Norris chu thlengin, pathumna chu Ferrari driver Charles Leclerc a ni thung.

McLaren driver Piastri chuan, "Kan team hian car ṭha tak min pe a, intlansiak ṭha taka kan hmachhawn theih nan min thlawp ṭha em em bawk. Sawisel tur kan nei lo, lawmna tur lam zawk zel a ni," tiin a team chungah a lawm thu a sawi.

Car intlansiakna season hman laiah McLaren diver pahnih hi, intlansiak vawi thumah ngawt mai pakhatna leh pahnihna an ni kawp tawh; team dang chungah an leng mek - Red Bull tan awm hle hle theihna chi a ni tawh lo ang.

Champion lai Verstappen hi intlansiak tawp lamah a che buai, lap nga chauh tlan hmabak an neih laiin pathumna a nihna chu Charles Leclerc lakah a hloh, a hnuah George Russell nen an inum laiin tlankawngah a tlan chhuak hret a, second 10 atan hrem a nih phah.

World champion vawi li ni tawh, tuna nomawi kawl mektu ni bawk Verstappen chuan, "Russell khan hmuh dan a nei a, kei pawhin thlir dan hran ka nei ve bawk. Inelna hautak a nih avangin rilru leh taksa nem taka awm theih a ni lo," a ti.

Russell hian Max-a chu midang tihnat leh tihchhiat pawisa loah a puh a, mahse Dutch tlangval Verstappen chuan a pawm lem lo, car intlansiakna a hautak thuin a lo chhang ta zawk a ni.

Khawvela car intlansiakna sang ber hi June 15, Pathianni zanah an tlan chhunzawm leh dawn. Circuit Gilles Villeneuve-ah Canadian Grand Prix an tlan leh dawn a ni.