Bethlehem Vengthlang an vanduai nawn

LBS Suzuki CYMA Football 2025-ah Bethlehem Vengthlang chu team ṭha ber zinga mi niin, final kalkawngah pawh extra time vawi khatmah an hmachhawn lo. Lalbiaksanga Colney kaihhruai BVT hian game nghet ṭha tak an khel a, game mawi tak khel telin, final thlengin inkhel thunun mah se, nomawi an chawi thei ta lo. BVT hian kum 2002 khan final an lut tawh a, final-ah Dinthar hneh loin an vanduai tawh bawk.

Football ngaina veng BVT hian tualchhung football-ah sulhnu ṭha an nei a, Republic Veng champion puitu Lalsangzuala Hmar hoin kum 2016 khan NECS Cup-ah an champion tawh. Sanga ho hian club level-ah Sepember 4, 2015 khan MFA Super Cup nomawi an chawi tawh a, an hneh chu Spanish manager Manuel Retamero enkawl Aizawl FC a ni.

Club nung ṭha tak neiin MPL5-ah phei chuan BS-a Colney hoin league round-ah pakhatna an ni hial a, football-ah sulhnu an nei ṭha. Mahse, Mizote World Cup tia an sawi CYMA Football nomawi an la chawi loh avangin an lawm hi a la kim thei lo ang.

Chutihrualin CYMA Football-ah hian final-a vanduai hi an awm ve nual tho. Armed Veng South chuan kum 1995 leh 2005 khan final lutin an vanduai ve ve a, Durtlang (2006, 2007) leh Vaivakawn (1985, 2000) te pawh vawi hnih ve ve final-ah an vanduai tawh bawk.

College Veng, Chanmari West leh Tlangnuam te final-ah vawi khat ṭheuh an vanduai tawh a; vawi khat aia tam champion tawh zingah Electric Veng leh Dinthar te final-ah an la vanduai lo.