Inelna hlawhtlinna tura thawktu CYMA SSC

LBS Suzuki 22nd Inter Branch YMA Football 2025 hi Mizoram Football Association leh Central YMA buatsaih a ni a, team 154 zet an tel chungin harsatna lian tham tawk loin inelna zawh a ni. MFA-in inelna an buatsaih hnem a, inelna lian tak tak thlenga an buatsaih tawh avangin ruahmanna siam an thiam a, inlena hlawhtlinna kawngah an pawimawh hle.

MFA hi Mizoram chhung football thuneitu sang ber an ni a, a hnuaiah hian sub committee peng hrang hrang awmin, kawng hrang hrangin hma an la ṭhin. Tun ṭum inelnaah pawh match commisioner leh referee te chet danah hmasawnna hmuh tur a awm a, famkim lo lai chu awm mah se hmasawnna tur hmuh tur awm hi chanchin lawmawm chu a ni.

Heng bakah hian artificial turf phahna ground pali RG Stadium, 1st Bn MAP Ground, Chite Playground leh Muallungthu ground a awm a, hei hian inelna buatsaih a tih awlsam phah hle. Aizawl khawpui chhungah artificial turf phah mekna a awm bawk a, CYMA Football a awm leh hunah chuan tun aiin inelna buatsaih a awl sawt thei ang.

MFA-in thawhpui an nei ṭha a, inelna hmingputu Central YMA lamin neitu chan an chang a, CYMA Sports Sub Committee-ten tha an thawh hlawk a, anni hi lang lo lamah an ṭangkai takzet. Tun ṭum inelnaah player endik nan voter ID hman a ni a, Screening Committee dinin, inelna ṭan hmain player document en chhuah vek a ni a, inelna a hlawhtlin nan a pawimawh hle.

Organising secretary Darremsanga chuan, "Kuminah a fair thei ang ber a, ruahman a ni a. Amaherawhchu a fel tawk lo laite chu a awm mai thei a, a leh pekah chuan tun aia ṭhain a buatsaih theih ang. Branch rawn tel zawng zawng chungah lawm thu kan sawi. Ṭhalai rual, talent nei ṭha tak tak, mi 3000 chuangin inelna an hmachhawn hrim hrim pawh kha chanchin lawmawm a ni," tiin Vanglaini a hrilh.

CYMA Organising chairman Lalhmangaiha chuan, "LBS Suzuki 22nd Inter Branch YMA Football Tournament tluang takin kan zo fel thei a, a lawmawm takzet zet. CYMA Sports Sub Comt-te an thawkrim a, an hahna hi Mizo footballer-te tan malsawmna ni mawlh rawh se. MFA-te thawhpui an nuam takzet a, hetianga thawhhona ṭha hi kal zui zel thei se a duhawm khawp mai.

"Match Official te bakah ground duty in pe zo tak takte zar kan zo nasa hle. Branch rawn tel zawng zawng te hnenah lawmthu kan sawi a, kan Branch-ten thil dik taka tih kan duhzia a lang chho zelte kha a lawmawm takzet a ni. Tournament kan neih theih nana sum leh pai ṭul min tumsaktu LBS Suzuki-te ṭhalaite hmakhaw ngaitute chungah kan lawm em em bawk," tiin a sawi ve bawk.