Rempuii'n bronze a hlawh chhuak

Mizo shuttler beiseiawm Lalrempuii chuan national huap inelnaah medal a la leh ta a, Serchhip tleirawl hian Yonex-Sunrise

All India Junior Ranking Badminton Tournament 2025-ah bronze medal a vaw chhuak.

May 25 - June 1 inkara neih inelnaah hian Rempuii hi mixed doubles category-ah a inlan a, Showrya Kiran J. nen an ṭang dun. Bangalore khawpuia neih inelnaah qualifying round aṭangin bul an ṭan a, vawi thum an chak zawn hnuah main draw an lut.

Main draw hi round of 32 aṭanga khel ṭanin, quarterfinal thleng straight set vekin hnehna an chang thei a, semifinal an invaw kai. Mahse, final lut tur zawnna inkhelah, champion zui ta Vishnu Kedhar Kode leh Keerthy Manchala-te ṭang dun chu 21-18, 21-19 in an ngam lo a, bronze medal-ah lungawi an zir a ṭul ta a ni.

Rempuii hi Tanoo Chandra nen inkawpin Girl's doubles category-ah an inlan bawk a, seeded no.1 hial an ni thei. Mahse, quarterfinal-ah a vanduai zawkah an ṭang a, medal an la phak ta lo.

Chanmari West rawlthar H. Lalṭhazuala pawh he inelnaah hian a inlan a, May thlaa national level inelnaa gold medal hlawh chhuaktu hi a vanneih ṭum a ni lo - Boy's singles category-ah inlanin, quarterfinal-ah a zinkawng a tawp.