Swimming-ah Mizoram record siam

Mizoram State Sports Council Golden Jubilee lawmna chi khat atana neih, Inter-School & Open Swimming Championshiop 2025 chu neih zawh a ni ta a, P. Lalhlimpuia chuan Boys 50m freestyle-ah Mizoram record thar siamin, 26.84 second-ah a thleng a, hetiang zat lek hun hmanga hleuh chhuak thei Mizo swimmer an la awm ngai lo.

Aquatics Association of Mizoram (AAM) buatsaiha neih inelna hi sub junior, junior, senior leh open category-ah te ṭhen a ni a, sub junior-ah La Montessori School chu champion-in, junior-ah Gospel Centenary School leh senior-ah CLS Academy te an champion.

Inelna pumpuiah La Montessori school chu medal la hnem ber niin, sub junior champion school hian gold medal ringawt pawh pasarih an la a, silver medal pathum leh bronze medal pathum an la tel bawk.

Senior inelna chu a ngaihnawm ber tia chhal ngam a ni a, pakhatna CLS Academy leh pahnihna ZN Higher Secondary School ten gold pali ve ve an la a, silver la hnem zawk CLS Academy chu an champion ta zawk.

Aquatic Complex, ITI Veng, Aizawla neih inelnaah hian school 24 ngawt telin, swimmer 161 an inlan a, an zinga 108 chu mipa niin, 53 chu hmeichhia an ni - junior inelnaa best swimmer atana thlan Joel Zobiakvela chu gold la hnem ber niin, gold medal panga nen a haw a, an school Gospel Centenary champion theih chhan a ni.