Mizoramin national inelna badminton thlen tum

Mizoram Badminton Association (MBA) hruaitute chuan Badminton Association of India (BAI) honorary general secretary Sanjay Mishra chu kawmin, Mizoramin national level-a badminton inelna thlen an duh thu an hrilh.

MBA aiawhin sr. vice president H. Lalnunsiama, vice president H. Dolianbuaia leh secretary general Dr. K. Vanlaldinpuia te chu BAI annual general meeting (AGM) hmangin Delhi-ah an kal a, he hun hi MBA hruaitute chuan remchangah hmangin, national level inelna thlen an duh thu hi hruaitute hnenah an sawi a ni.

BAI hian AGM hi The Grand Hotel, Delhi-ah an nei a, President leh Assam Chief Minister ni bawk, Himanta Biswas Sharma kaihhruaina hnuaiah 2025-26 season atana BAI Calendar chu pawm a ni a, Sunrise India Private Ltd. leh BAI ten kum thum (3) chhung atan inremna lian tham tak an siam thu puan a ni.

Hei mai a ni lo - tournament hrang hranga player-te hlawh chu 100% thlenga tihsan niin, BAI sum dinhmun a ziaawm tak avangin, BAI-in kum tina a hnuaia association-te a pek ṭhin sum pawh tihsan a ni tel.

MBA hruaitute chuan BAI nena inremna thar ziaktu, Sunrise India Private Ltd hotute nen inkawmna an nei nghal a, contract agreement an neih mek chu awlsam zawka kalpui theih dan an sawipui a ni.