Huaisen takin Swiatek a chak

French Open hmeichhe champion lai Iga Swiatek tan pawh kawng a awlsam vek bik lo - Pathianni zan khan Polish nula hian set a hloh hmasak hnuah Elena Rybakina chu hneh letin quarterfinal a in hlangkai.

Philippe-Chatrier Court-ah seeded pangana Swiatek hian set hmasa ber chu a hloh, a khingpui Rybakina hian game khat bak a laktir lo. Mahse, set hnuhnung pahnihah erawh player ṭha zawk a nihna lantirin 1-6, 6-3, 7-5 in a chak.

Roland Garros title a lak hmasak ber aṭangin kum nga a liam tawh a, clay court inelna lian berah hian a ṭha bik a nihna a lantir leh thei a, zaninah seeded 13-na Elina Svitolina nen an inhmachhawn leh ang.

Kum 24 mi Swiatek chuan, "Min nawr na em em a, a bik takin set khatnaah phei kha chuan ka tan khan thawk lakna hman pawh a awm lo, chuvangin inkhel kal hmang tih muan a ngai tih kha rilruah a lo lang nghal.

"Zawimuangin ka insiamṭha a, set hnihna aṭang kha chuan ka game pangngai ka khel thei. Tournament lianah chuan match zawng zawng hi a harsa a ni tih a takin ka hmu," tiin a sawi.

Inkhel dangah Aryna Sabalenka pawh a chak - seeded pakhatna hian Amanda Anisimova chu 7-5, 6-3 in a hneh. Belarus nula hian a zawnin Grand Slam bikah quarterfinal vawi 10 a lut ta; Serena Wuilliams (2014-2017) hnu hetiang ti leh thei hmasa ber a ni.