Ruahsur hnuaiah mipui sing chuang

Fur lai a ni a, ruah sur chhoh nasat lai tak a nih avangin CYMA Football final khelh hmain inkhelh hun sawn chungchang an rel hial. Hetiang boruak karah hian Aizawl South Derby en turin mipui sing chuang an puang khawm a, khaw ṭha hnuai ni ta se, an la tam zawk ngei ang.

Bethlehem Vengthlangin chhiat an tawk a, chutichung chuan Republic Veng ṭantu aiin an ṭhahnem zawk hialin a ngaih theih. BVT hian nomawi an phu a, an thawkrim a, final-ah pawh khel ṭha zawk mah se an vanduai ta zawk.

Republic Veng pawhin ṭawiawmtu an nei ṭha a, kawr sen ha mipui thlir khan Republic Veng hlangin an daih dawn lo - Republic United angin an thawk chhuak tihna a ni. Republic Veng aṭanga indang Upper Republic leh Republic Vengthlang ten an ṭawiawm ṭha hle.

Khelmual chhungah BVT khel ṭha hret mah se khelmual pawnah Republic Veng an mumal zawk a, banner lian leh flag bakah mipui au tur kaihruaitu ṭha an nei. An champion hnuah an phur lehzual a, RG Stadium aṭanga Waiting Shed (Biak in bul) thlengin nomawi nen kawng an zawh nghal a, Pathian hnenah an hlawhtlinna avangin lawmthu an sawi.