Xana, i tan a ni - Enrique

June 6, 2015 a ni a, Champions League final-ah Barcelona chuan 3-1 in Juventus an hneh a, treble champion an ni. Inkhelh zawhah chuan naupang, kum ruk mi vel awm lek chuan khelmual lai takah Barcelona flag a vai lauh lauh a, a bulah chuan lawm takin a pa chu a lo ding reng a.

An pafa chuan an inkai a, fans tam zawk haw tawh hnu thlengin chu khelmualah chuan an awm a, an hawi kual a, an hlim a ni. Chu hmeichhe naupang duhawm tak chu, a hming chu Xana a ni a, a pa chu khatihlaia Barcelona coach Luis Enrique a ni.

Mahse, hun hi a kal chak asin - August 29, 2019 a ni a, kha hmeichhe naupang khan, he khawvela kir leh ngai tawh lo turin a mit chu a chhing hlen ta! Pa rorum Enrique meuh a ṭap a, a fanu naupang ber thihna chuan a nghawng na takzet.

Enrique chuan a fanu hriatreng nan 'Fundacion Xana' tih chu a din a, mi harsate ṭanpuina tura a din a ni. Chu foundation puala zanriah an buatsaih ṭumte kha aw - hmeichhe tleirawl hmelṭha tak takin Enrique chu an hual a, an titi a. Tute nge an nih maw? E le, a fanu Xana ṭhiante an ni.

Xana pawh kha la dam se chuan, tleirawl hmelṭha tak a ni tawh ang. Mahse, he khawvelah hian a awm tawh lo - cancer natna hlauhawm tak, 'osteosarcoma' chuan naupang duhawm tak a nih vang ngawtin a chungah zahngaihna a lantir bik si lo.

A hringtu pa tana a nat turzia hi aw! Mahse, Enrique zawng pa danglam a ni. Spanish coach hian, "Kan hun tawn thim ber hi zirtirna min pe nasa bertu chu a ni," a ti hram a!

"Mi tam tak chuan, 'Mahse, i fanu kha kum kua mi lek niin a thih kha...' an ti ang. Mahse, kei chuan chutiang chuan ka thlir lo. Ka fanu khan kum kua zet, hun duhawm tak min rawn hmanpui a, amah hriatrengna tur min hnutchhiah a ni," a ti - i va chhel tak!

Enrique chuan, "Vannei ka intih leh tih loh inhre duh mai thei. Kei chuan vannei ka inti takzet, ka vannei thlawt," a ti a, hun rei lotê pawh ni se, a fanu nena an hun hman chu a ngaihlu hle.

Kum 2025 a ni a, Enrique chuan Champions League final-ah a team a kaihruai leh dawn - chak pawh ni se, lawmpui turin a fanu Xana a tel ve tawh dawn lo. Mahse, Spanish coach hian, "Arsi êng tak, kan chhungkaw tana kawng hruaitu i ni dawn," tiin a fanu hi a thih hlim khan a lo thlah tawh.

Enrique chuan, "Kan hnenah hian a la awm reng a, min thlir reng a ni," a ti - kum tam liam taa amah chhuang em emtu, a fanu kha zaninah hlim taka nuih tir leh a duh dawn a, chumi tur chuan Inter Milan hneha Paris St-Germain chu treble champion nihpui a tum ang.

Kum 52 mi coach hian Xana nena an hun hmante kha a la hre reng. "Champions League nomawi kan chawi zana Xana nena kan hun hman kha ka la hre reng. Khelmuala Barcelona flag a phun lai, thlalak duhawm tak hi ka la nei reng.

"Keipawhin Xana ang khan Paris Saint-Germain flag hi khelmualah phun ka duh. Ka fanu chuan tisain min telpui tawh lo a ni mai thei a, a thlarau erawhin min awmpui reng dawn. Chu chu ka tan a hlu em em a ni," a ti.

May 31, Inrinni zan a ni ang a, Enrique-a'n Allianz Arena-ah PSG flag a phun dawn em? Zaninah kan hre dawn - Xana, nang pawhin i lo thlir ang tiraw?