PSG vs Inter - Tuin nge nomawi hawn dawn?

Zanin dar 12:30-ah Champions League final khelh a ni dawn a, Paris Saint-Germain leh Inter Milan ten European football-a club ṭha ber nih an inchuh dawn - Allianz Arena, Munich khawpuiah an inkhel ang.

Club pahnih hi season ṭantir kha chuan champion beiseiawm team zinga sawi tel an ni lo. Mahse, coach ṭha tak pahnih an nei a, a tira rin hlawh lo club pahnih khan zaninah chuan final an khel dawn ta.

Team pahnih hian inan lohna tak an nei - Inter hian player kum upa tawh, tawnhriat nei ṭha rual, club tam takin "a muang tawh" tia an hnawl tur ang chi rual an kawl a, PSG-in player naupang rual an kawl thung.

Club pahnih coach ze inang lo, khelh dan phung inang lo, player kum inthlaute hian final en a tichâkawm zual a, PSG hi an champion chuan treble champion an ni dawn.

UCL ngamtu Inter

Kum 2021 khan Simone Inzaghi-a'n Inter a enkawl ṭan a, season zawna Coppa Italia nomawi a chawi hnuah Serie A a champion pui a, Champions League final a hruai thlen vawi hnihna a ni bawk.

Inzaghi team hi tlarhnung lama an inremphui ṭhin avanga hriat hlawh ni mah se, a ṭul chuan attacking football hmuhnawm tak chhawp chhuak theitu an ni - a awih lo tan semifinal thlirlet mai tur!

Tun season UCL-a match 14 an khelh tawhah Inter hi vawi khat chiah an la tlawm a, Bayer Leverkusen lakah 1-0 in an tlawm - an hneh zingah Arsenal, Bayern Munich leh Barca an tel miau a, dah hniam theih an ni lo.

Mahse, tun season-ah Inter an vanduai. Serie A tawp niah nomawi hlohin, table-ah pahnihna an ni a, Coppa Italia lamah semifinal-ah an zinkawng a tawp bawk. UCL an chawi a nih erawh chuan, "Season hlawhtling a ni," tiin a sawi ngam ang.

Inter an ṭha

Italian club-in hliam langsar sawi tur an nei lo a, mahse, an lawmna tizual turin hliam vanga an chawlh hnuah Benjamin Pavard leh Piotr Zielinski ten training an zawm leh tawh bawk.

Barca laka hliam tenau nei Lautaro Martínez pawh hahdamna hun pek a ni a, zaninah chuan bul a ṭan ngei a rinawm - Martinez thlawp turin Murcas Thuram a awm a, French striker hian an ram club hi velh a châk dawn!

Playmaker Hakan Calhanoglu hi inkhel thlak danglam thei khawpa player thiam bik a ni a, kum 36 mi Henrikh Mkhitaryan pawh a kum tam deuh tawh mah se, a la rintlak viau zel.

Tlarhnungah kum 37 mi Francesco Acerbi leh kum 26 mi Alessandro Bastoni te an rintlak viau ṭhin a, wing back aṭanga Federico Dimarco leh Denzel Dumfries te goal nawr tur hi PSG tan dan chah a ṭul ang.

Enrique-a PSG!

PSG-in Champions League nomawi chawi duhin sum tam tak an seng a, star langsar rual Lionel Messi, Neymar leh Kylian Mbappe te meuh an kawl chung pawhin an champion thei chuang lo.

Mahse, Luis Enrique-a'n PSG mamawh chu star rual ni loin, 'thawhhona' a ni tih a takin a lantir a, player naupang rual hmanga a team din chu treble champion thei dinhmunah an ding mek.

PSG tlarhma mawlh hi an hmuhnawm leh dawn. Ballon d'Or dawng thei tura sawi zinga mi Ousmane Dembele hi a hlauhawm leh ang tih a chiang a, thlawp tura Bradley Barcola leh Khvicha Kvaratskhelia an awm dawn bawk avangin Inter tlarhnungin hna an ngah dawn.

Midfield-ah Fabian Ruiz thiamzia inhrilh nawn a ngai lo a, Joao Neves leh Vitinha te ho an awm bawk avangin midfield nei ṭha ve tak tho Inter nena an inhmachhawn tur hi en a châkawm zual.

Thawhlehna chu

PSG hian UCL-ah beisei angin season bul an ṭan lo a, league stage-ah khan vawi thum ngawt an tlawm - an hneh lohte hi Arsenal, Atletico Madrid leh Bayern Munich an ni a, knockout playoff hmangin last 16 an lut ve hram.

Mahse, knockout an khel chiah a, PSG hi an ṭha ta tawlh tawlh em ni chu aw, tih mai tur a ni. League round hmahruaitu leh champion tura beisei Liverpool chu last 16-ah an pet chhuak a, Aston Villa leh Arsenal hneh zuiin final an lut.

Enrique-a'n English club pathum an hneh hnuah, "League tenau maw kan nih a?" tiin league tenau anga Ligue 1 sawi ṭhintute a tih el a, an ṭhat tawkzia nemngheh nan UCL nomawi an chawi a ngai thung.

PSG hi an attacking a nat piahlamah player an thawk rim a, ball an hlohin an tlan let vat a, counter-ah an hlauhawm thei viau - zaninah PSG chanchina la thleng ngai lo thlentir a, nomawi chawi an tum dawn e.