LBS Suzuki CYMA Football 2025: Inkhel hmuhnawm bikah Republic Veng an dingchang

LBS Suzuki 22nd Inter Branch YMA Football 2025-ah Republic Veng leh Durtlang ten football hmuhnawm bik an chhawp chhuak a, goal nga luhna inkhelah Lalsangzuala Hmar enkawl Republic Veng 3-2 in an vannei ta zawk.

Final-ah Aizawl South Derby hmuh tur a awm dawn a, May 31, Inrinni chawhnu dar 1:30-ah Bethlehem Vengthlang leh Republic Veng an inkhel dawn. Team ṭha pahnih inhmachhawn tur a ni ringawt lo a, coach ṭha pahnih Sanga Hmar leh Bsa Colney te inbeihna tur a ni tel ang.

Valpuia class

RG Stadium-a semifinal hnuhnung zawk ruahsur leh chhum zingin tibuai deuh mah se inkhel hmuhnawmna a hliah khuh pha lo. Minute 12-na lekah Republic Veng captain Lalnunzira freekick vawrh luh chu Durtlang goalkeeper Hlutea'n dang hram mah se a per chu Laldanmawia'n chiang zetin a pet goal.

Durtlang lamin captain Ricky Lallawmawma awm loh an tuar a, an goal bawh a na thei lo a, Republic Veng tlarhnung a phui ṭha bawk. Minute 83-naah Mizoram striker ṭha mi F. Lalrinpuia'n (Valpuia) freekick chu hla zet aṭangin a pet lut a, Durtlang keeper tan dan ngaihna a awm lo. Tun inelnaah Valpuia'n freekick aṭangin goal thum a khungna a ni chiah bawk.

Tlawm duh lo Durtlang

Republic Vengin Valpuia an la chhuak a, goal hnih venhim tum mah se an tum ang ngawtin thil a thleng lo. Matthew Lalhmangaihzuala'n minute 87-naah box pawn aṭangin goal kilah tak a dah a, Durtlang beiseina a rawn siam.

Durtlangin an nawr chhunzawm a, minute li hun pek belha minute linaah Joseph Vanlalhruaia a rawn inlar a, yard 30-na vel aṭangin goal kilah tak a pet lut. Goal mawi vangin Durtlang mipui thawm a ṭha hle.

C. Hriata show

Republic Vengin Valpuia la chhuak tawh mah se Jamshedpur midfielder C. Lalhriatpuia an nei a, player talent nei ṭha bik hi a theihna hmuhin a awm. Minute 120 chhungin a vannei tawk lo a, mawi taka Durtlang defender a bum hnuah pet over a nei a, goal ban pet per a nei bawk.

Extra time-ah pawh injury time-ah C. Hriata hian Durtlang defender Muanzova a vir khum a, box pawn chiahah freekick a hlawh chhuak. C. Hriata'n freekick hi petin goal kilah tak a pet a, penalty shootout ngai loin Republic Veng a chakpui.

Republic Vengin an thiam vanga chakah an inngai lo a, inkhelh banah coach Sanga Hmar chuan, "Pathian vang a ni a, kan tih theih a ni lo. Pathian hnena lawmthu sawi mai hi kan tih tur chu a ni," tiin team-te bulah a sawi.