Silly Point: 2-0 Lead Theory

Football hi chu intihsualchhawk infiamna a ni a. A tisual tlem zawk zawk team an chak mai a ni - Johan Cryuff

Khatia football club ropui FC Barcelona thla ruk chhung Sports Psychology course ka zirlai khan, khi Johan Cryuff-a thusawi khi an philosophy pakhat a ni a. Football mai ni lo, eng infiamna discipline-ah pawh hian a lo ni vel vek ni ta zawkin tunhnu hian ka hre ta.

Inlehthal

Nimin tuk khua a lo var a, Vanglaini Chanchinbu infiamna huang kan han bih hmasa bera. Football khawvel bikah 2-0 a hmahruai team te chak loh thu inkhel pawimawh pathumah ka hmu ta tlat mai.

National Under 20-ah kan Mizo tlangvalte 2-0 a hma an hruai hnuiin 4-2 in Delhi lakah final-ah an tlawm a. LBS Suzuki 22nd Inter Branch YMA Football Tournament quaterfinal lamah lah, Durtlang leh Republic Veng ten si hnih an phur hnuiin, an khingpui Kawnpui Vengthar leh Sialhawk te lehthal ve vein, semifinal-ah an inpetkai.

Hun rei tak chhung chu he 2-0 lead theory hi football khawvel-ah lead theory anchhia tih khawpin a lo thang tawh a. Thudik, fiah tlak nge, ngaihruatna mai mai tih erawh research neih deuh a ngai mahna le.

2 - 0 IPL Playoff

Test Cricket chawlhsan ta, India cricket arsi lian pahnih Rohit Sharma leh Virat Kohli ten IPL Playoffs 2025 an khel ve ve dawn a. An chanchin leh mangṭhana thu hi chu ṭum dang atan khek ila.

Mumbai lamin kumina 2-0 a League Stage-a an ngam tawh lo Gujarat Titans lamah hian 2-0 Lead theory hi a dik tih khawvel hmuah phochhuak thei tak maw? Zanin qualifiers 1-a table topper pahnih Punjab Kings leh Royal Challengers Bengaluru intum tur erawh 1-1 anla ni a. 1-1 Theory erawh a awm ka hre lo.

Tihsual tlem

'Law of Average' an ti a, Infiamna khawvelah hian, kan tumpuite/ tumpuipa ṭhat uchuak danglam vang emaw, thil mak dangdai dan zawh rual loh avanga hnehna kan chan zawh loh hi chu 5% chance an ni a.

A bak 95% hi chu : kha kan tumpui player khan kan player panga vel rawn bum pheiin, meter 15 vela kualin ball a rawn pet banana emaw, kan tumpui batsman pa kha, a ball hlap apiang a six zel tih aiin, keimahni tihsual (error) aṭang zel hian tumpuite hi hun ṭha leh duhawm kan lo siamsak zawk ṭhin a lo ni.

Inter Branch YMA semi final leh IPL playoff-ah tute dingchang ang? tia min zawh chuan, team tha zawk leh thiam zawk sawi tur ka hre lo. Tihsual nei tlem zawk zawk ang dingchang zel ang tih hi ka chhana ni mai teh se...