United an chak; Spurs an tlawm

Europa League final khel zo hlim, league lama beisei phak lo pahnih, Manchester United leh Tottenham Hotspur te pawh Pathianni zanah an inlan a, United an chak laiin, Spurs erawh an mualpho.

Old Trafford-ah United hian Aston Villa chu 2-0 in an hneh a, an tan beisei tur awm tawh lo mah se, Unai Emery enkawl Villa tan erawh UCL khelh beiseina a bo zui.

Villa tan chuan zan duhawm lo, tia chhiar loh rual a ni lo. First half hun pek belhah goalkeeper Emiliano Martinez chu hnawhchhuah a ni a, Argentine keeper hian Rasmus Højlund chu tlan chhuaka a tihtluk avangin red card a hmu.

Player kim loin Villa an khel a, an vanduai zui. Morgan Rogers chuan goal hmahruai a khungah a inngai a, mahse, referee-in United goalkeeper Altay Bayindir-a kuta ball awm tawh chu Rogers hian a pet luiah a ngai a, goal-ah a pawm lo.

Referee Thomas Bramall-a'n hamrik a ham hian Rogers-a'n a la khung hman lo a, hei vang hian video assistant referee (VAR) a inrawlh thei lo. Amad Diallo leh Christian Eriksen (penalty) ten United tan goal an khung zui a, 2-0 in an chak.

Newcastle United-in 1-0 a Everton an hneh loh avangin Villa tan UCL khel turin United draw a tawk a, mahse, keeper hnawhchhuah a ni a, an goal khung pawm a ni lo bawk a, an vanduai - Villa hian referee pawl Professional Game Match Officials Limited (PGMOL) hnenah an lungawi lohna an theh lut zui.

Hetihlai hian Europa League champion Tottenham Hotspur an mualpho a, an mikhual Brighton & Hove Albion chu 4-1 in an ngam lo. Spurs hian Dominic Solanke (penalty) hmangin goal hmahruai khung mah se, Brighton hian Jack Hinshelwood (2 goals), Matt O'Riley (penalty) leh Diego Gómez hmangin an chhanglet a, an chak chiang.

Spurs hi an tlawm avangin table-a 17-na ni chungin season an khar a, league-ah vawi 22 an tlawmna niin, English top flight league-a match 38 khelh a nih hnua heti zat tlawm chunga relegate lo hmasa ber an ni!