German Cup champion Stuttgart

Kum 2007 hnua a vawi khat nan VfB Stuttgart an champion ve leh ta - Inrinni zan khan Arminia Bielefeld chu 4-2 in an hneh a, 'club harh thar lehna' chan chu an chhunzawm zel.

Stuttgart hian 2006-07 season khan Bundesliga nomawi an chawi a, hemi hnu hian inelna lian thamah an champion leh tawh lo. Season hmasa khan Bundesliga-ah pahnihna an ni a, tun season-ah DFB-Pokal champion an ni ta.

Olympiastadion Berlin-a inkhelah Stuttgart hian first half chhungin goal thum an khung hman - Nick Woltemade, Enzo Millot leh Deniz Undav ten goal khat ṭheuh an khung.

Millot hian minute 66-naah a khung belh leh a, nuamsain an chak dawn niin a lang hman. Mahse, minute 80 hnu lamah Julian Kania leh Josha Vagnoman (own goal) ten an khung ve leh a, a tawpah chuan 4-2 in Stuttgart an chak hram.

Arminia Bielefeld-in hnehna chang zo lo mah se, an chanchin erawh hriat a ni reng tawh dawn - he club hi German third division club an ni a, heti chung hian final an lut thei.

Final an lut a ni mai lo a, an kalkawngah first round-a second division club Hannover 96 (2-0) an hneh tih loh chu Bundesliga club vek an hmachhawn a, Union Berlin (2-0), SC Freiburg (3-1), Werder Bremen (2-1) leh Bayer Leverkusen (2-1) te an hneh thei a ni.

Hetihlai hian Stuttgart an nep bik lo. Season hmasa an chet ṭhat nana player pawimawh Hiroki Ito (Bayern Munich), Waldemar Anton (Borussia Dortmund) leh Serhou Guirassy (Dortmund) te chân mah se, coach Sebastian Hoeneß hoin German Cup champion an ni ta tho a ni.