Piancham lawm nan Djokovic a chak

Novak Djokovic chuan kum 38 a tlin chamah Matteo Arnaldi chu 6-4, 6-4 in a hneh a, harsa lutuk loin Geneva Open semifinal a lut - season a hman ṭhat loh tak mai chu a siamṭha chho zel dawn ta niin a lang.

April thlaa khelh zawh tak Italian Open-ah khan Djokovic hi hneh nei loin a tla, a zawnin match thum chhung chak ni hmel hmu loin a awm, tunah erawh insiamṭhain a zawnin hnehna a chang ve leh ta a ni.

Serbian star Djokovic chuan, "Geneva hi ka tan hmun ṭha a ni, nikum khan semifinal ka lo khel tawh bawk a, kuminah chuan a hma aia ṭha zawk ka thlen theih ka beisei," tiin a sawi.

Nikum leh kuminah Djokovic hian Grand Slam title lak a nei lo, karleh aṭanga khelh tur French Open atan beiseina a nei sang chho hle ang.