Zanin dar 8:00-ah Inter Village Basketball final; Zarkawt Vs Nursery Veng

ICFAI University Mizoram Inter Veng Under 23 Basketball Tournament 2025 final chu zanin dar 8:00 hian Hawla Indoor Stadium, Republic Vengthlangah an khel dawn. Veng leh veng inelna a nih avangin entu pawh an ṭhahnem tura ngaih a ni.

Nilaini zan khan Zarkawt hian 98-69 in Bethlehem Vengthlang an hneh a, United States-a College baskebtall khel thei Lalhnehpuia an neih avangin champion inbeiseina sang tak an nei ang. Mahse, tun hnai basketball inelnaah Nursery Veng nasa takin hma an sawn a, champion tura ringtu pawh an tam hial ang.

Ningani zan khan Nursery hian an veng ṭhenawm Khatla South chu 84-82 in an hneh a, inkhel a nung ṭha hle. Nursery hian Khatla TBL-ah pawh hmun pawimawh chang pha Emannuel Vanlalawmpuia an kawl a, Khatla South an hneh ṭumah pawhin point 40 ngawt a nei a ni.