Pro Volleyball Hmeichhe final - Luangmual hmaah Jimmy Club Kanan

Zanin dar 8:00 hian EverHome Pro Volleyball League hmeichhe final khelh a ni dawn, team ṭha Luangmual hmaah beiseina nei sang Jimmy Club Kanan an ding dawn, inkhel a hmuhnawm ang.

LPS Arena, Falkland Vengah team ṭha pahnih hi an intawng dawn, a hmuna en tur tan kal hma a fuh ang. Mahni in lum aṭanga en duh tan LPS chuan an live dawn a, youtube lamah en theih a ni dawn bawk.

PVL 2025-ah hian hmeichhe inelna lamah team pathum an inlan a, league round lamah an inkhel kual vek. Luangmual hian an league match hnuhnung zawkah Kanan hi 4-1 in an lo hneh tawh a ni.

Vawi thum champion tawh an nih avangin Luangmual hi an buk a rit leh dawn a, an intawn tawhnaah an chak bawk avangin inrintawkna an nei sang khawp ang - Kanan tan an intawn hmasaka point 22 hmutu Rithegaa G ven uluk a ngai dawn.

Luangmual hian Rithegaa G an chah luh bakah an player ṭha Remlalnghaki leh Lalramliani te an rintlak a, kum 2023 leh 2024 champion an nih tawhna chu kuminah belhchhah an tum dawn a ni.

Jimmy Kanan tan beisei bo a ni bik lo, state pawn aṭanga an chah luh Jashanpreet Kaur hi danglamna siam tham a ni a, tualchhung player Lalmuanpuii leh Lalrammawii ten an thlawp ṭha a nih chuan mellung phun thei turin theihna an nei ve bawk.