Intiat tawk Kawnpui Vengthar Vs College Veng

LBS Suzuki CYMA Football last 16 match hmasa berah vawiin chawhma dar 10:00 hian Kawnpui Vengthar leh College Veng te an inkhel dawn a, an inkhelh tawhna thlirin an intluk tawk viau tura ngaih an ni.

Kawnpui Vengthar hian Aizawl FC winger hlui Albert Zohmingmawia an kawl a, MPL10 best player H. Lalbiakthanga an neih bakah Aizawl FC goalkeeper pahnih Vanlalhriatpuia leh Lalhruaitluanga te an kawl. Champion rinkai chu ni pha lo mah se team ṭha hneh thei tur an ni.

College Veng hi MPL club pawh lo enkawl tawh Sabito Remlalthlamuanpuia an kawl a, veng lian ni lo mah se football thiam veng an ni. Kum 2023 pawh khan CYMA Football-ah final an lut tawh a, Aizawl DFA hnuaiah football club an neih avangin player chhawr tur an ngah phah.

Mizo goalkeeper ṭha Zothanmawia (T. Mawia) an nei a, ani hi an vengah chuan defender ṭha a ni. College Veng hian goalkeeper ṭha an ngah a, tun ṭumah hian MPL-ah pawh tawnhriat ngah Lalruatpuia an hmang. Attacking lamah Lalpekhlua a nung ṭha a, College Vengin player-te au phur turin ṭantu an nei ṭha bawk.