Chawhnu dar 2:30-ah Bethlehem Derby

LBS Suzuki 22nd Inter Branch YMA Football Tournament 2025 last 16-ah Bethlehem Derby hmuh a a ni dawn a, hei hi thil thleng zen zen lo a ni. RG Stadium-ah vawiin chawhnu dar 2:30-ah Bethlehem Vengthlang leh Bethlehem te an inkhel ang.

Bethlehem Vengthlang hi inelna ṭan hma aṭanga champion rinkai zinga mi an ni a, MPL coach langsar Lalbiaksanga Colney an la lut. ISL club Chennaiyin defender PC Laldinpuia leh Odisha FC midfielder K. Lalṭhathanga te an langsar a, player ṭha dang pawh an ngah avangin BVT hi chungnung hle tura ngaih an ni.

Chutihrualin Bethlehem hian MPL club an nei ṭhin a; squad-a awm ve ṭhin Vanlalpeka, Ramthansanga leh Laldintluanga te chu tun ṭuma an player pawimawh an ni. Lalrinawma (Papuia) leh B. Lalramnunsanga (B. Mama) te football zirin Bengaluru-ah an awm a, MPL Under 17-a Venghnuai champion ṭuma tel Lalawmpuia an kawl. Vanneih vang ngawta tun dinhmun thleng an ni bik lo.