Coach tel lo a khel tur Djokovic

Novak Djokovic chuan coach thar zawn a hmanhmawh lo tih a sawi a, clay court season an hman chhoh mekah coach tel loin inelna hman hmasak phawt a tum tihna a ni.

Grand Slam vawi 24 champion tawh Djokovic hi a coach Andy Murray nen an inṭhen, a hnuah coach dang a la nei leh rih lo. French Open inbuatsaih nan Genova lamah tournament nem zawk khelh erawh a tum thung.

Serbian star Djokovic chuan, "Tun dinhmunah chuan coach ka mamawh lo. Min kaihruai tur thlan chunchangah thutlukna siam hmanhmawh erawh ka ngai lo, tun aṭanga tournament ka khelh tur ṭhenkhatah chuan coach tek loa khelh ka tum.

"Andy Murray nen tluan leh ṭha takin hna kan thawkdun a, kan thawhdunna a tawp chhan min zawt an tam. Boruak ṭha lo leh thil kal fuh lo vang lam a ni lo a, thawnthu dang ziah duh vang leh boruak thar tem a ngaih vang a ni zawk," a ti.

Djokovic hian kuminah kum 38 a tling dawn a, a vanglai a pel tawh. A kum tam deuh tawh mah se tennis a la chawlhsan mai lo, tun hma lam angin nomawi chawi harsa deuh tawh mah se, player hmachhawn châkawm loh tak chu a la ni thung.