Thunder an tho chhuak

Dinhmun hniam zawka an din hnuah Oklahoma City Thunder chuan nimin zing khan Minnesota Timberwolves chu 114-88 in an hneh a, Western Conference Finals game hmasa ber an la.

Nimin zing Paycom Center-a inkhelah, chawlhlawk laiin Minnesota lam hi 48-44 in an sang zawk. Mahse, inkhel chawhnu lamah Shai Gilgeous-Alexander a inlar, a ni hian point 31 a hmuh zinga 20 chu quarter hnuhnung pahniha a neih niin a team a chak pui.

Gilgeous-Alexander chuan, "A nihna takah chuan a tir lamah kha chuan kan talbuai a, harsa vak loa basket neih mai theih tur anga lang te kha kan hlah ṭhin, chawlhlawk hman hnuah erawh kan nihna tak kan lantir thei thung," tiin a sawi.

Gilgeous-Alexander hian season a hmang ṭha, a bik takin tun hnaiah a khel ṭha thei hle, a match hnuhnung paliah chuan point 30 a nei tling vek a, game 2 an khelh leh hunah pawh rinrawl a ni chhunzawm ang.

May 23, Zirtawpni zing dar 6:00 hian Conference Finals game 2 an khel leh dawn a ni.