Mac Allister inlan tawh dawn lo

Liverpool boss Arne Slot chuan an midfielder pawimawh Alexis Mac Allister chu tun season-ah a inlan tawh loh tur thu a sawi a, May 25, Pathianni zana an league match hnuhnung berah Argentine midfielder hi a tel dawn lo tihna a ni.

Slot chuan, "Tun season-ah Alexis hi a inlan tawh rih lo ang. Season thar atana inpuahchah a, inpeih hman turin tunah chuan chawlh a mamawh a, buaina a awm lo ang.

"Ka hriat sual loh chuan, season hmasa kha a Argentine rilru paukhauh nen a khel tluan a, mahse, tunah erawh hliam tenau a nei a, lian tham lo mah se, hahdamtir hi a finthlak zawkin ka hria a ni," a ti.

Mac Allister hi Thawhṭanni zana a club hlui Brighton & Hove Albion nena an inkhelah pawh a inlan tawh lo. Brighton aṭang hian June 2023 khan Reds hi pound maktaduai 35-in a zawm a, £55mtd thlenga a man hi sang chho thei tur a ni.

Premier League champion Liverpool hian Pathianni zanah hian Crystal Palace an mikhual dawn a, inkhelh zawhah EPL nomawi hlan an ni ang - inkhel dawn lo mah se, nomawi lawmnaah chuan Mac Allister hi a awm tho ang.

Kum 26 mi midfielder hi tun season-a Liverpool champion theih nan player thawhhlawk a ni a, league match 35-ah inlanin, goal nga a khung bakah assist vawi nga a nei bawk.

Argentina tana World Cup champion lo ni tawh midfielder hian inelna hrang hrangah match 49 khelin, goal sarih a khung a, assist vawi ruk a nei.