Betis inkhelh hun sawnah Maresca lawm lo

Chelsea manager Enzo Maresca chuan Conference League final-a an khingpui tur Real Betis inkhelh hun an sawnsak chungchangah a lawm lo, hahchawlhna hun an nei tam bik dawn niah a ngai.

Ruahman dan pangngaiah chuan Real Betis hian tun kar tawp hian La Liga hmachhawn tur an ni, Pathiannia match an khelh tur chu ni hnihin sawn hmasak an ni thung.

Chelsea erawhin May 25, Pathianni zanah Premier League match hnuhnung ber an khel dawn. Champions League khelh tuma an elpui Nottingham Forest an lenchilh dawn a ni.

Blues manager Maresca chuan, "Inkhelh hun chu eng pawh ni se la buaina tur a awm lo. La Liga, Premier League leh EUFA hnuaia inelna pawh ni se, inkhelh hun sawn chu sawisel theih a ni lo.

"Mahse, ruahmanna engkim siamfel sa vek a ni tawh a, final khelh dawn hnai boruakah inkhelh hun sawn a ni hi chu mimal ngaihdan chuan a lawmawm loh a, keimah ang bawkin midang pawhin dik an ti lo ang," tiin a sawi.

Chelsea hi tun dinhmunah EPL table-ah pangana an ni mek, an league match hnuhnung berah an chak lo a nih chuan season tharah Champions League an khel phak dawn lo, chuvangin match hautak an khelh hnu lawkah Conference League hmawr bawkna an khelh zui a ngai dawn a ni.