Palace-in champion an lawm

Manchester City barakhaih a, FA Cup champion Crystal Palace chuan an club chanchina nomawi lian tham an chawi vawi khatna an tawn hnuah league match an khel leh ta a, 4-2 a Wolverhampton Wanderers hnehin champion an lawm.

Palace hian goal chhuah hmasa mah se, Premier League champion nih hnua chak thei lo Liverpool ang nih an duh lo a, minute thum chiah si an phur hman tihin an si phurh an sut fel der.

Selhurst Park-a inkhelah Palace fan-te an champion lawmin an zai rual dual dual a, mahse, goal an chhuah hmasa thung. Minute 24-naah Emmanuel Agbadou chuan Wolves tan goal hmahruai a khung.

Mahse, Palace fan-te an hnual phah lo - an champion tlat alawm! Player lam pawhin khelmualah an tih tur an ti zui a, Eddie Nketiah chuan goal hnih rawn khungin, minute 40 pawh a tlin hmain Palace hi 2-1 in hma a hruaipui der.

Arsenal striker hlui hian Romain Esse siamsak a khung hnuah, Ismaila Sarr-a cross chu goal-ah a chantir leh a, Palace fans thawm a ring lehzual hle.

Goal dang lut loin chawlhlawk hman a ni a, second half pawh Palace-in an tiṭha zawk - Chelsea aṭanga loan-a Palace pantu Ben Chilwell chuan freekick a pet a, minute 50-naa a freekick hian Agbadou-a lu a fuh hnuah goal-ah a lut.

Mahse, Wolves-in tlawm mai an tum bik lo. Agbadou-a goal hmahruai siamsaktu Jorgen Strand Larsen inlar ve lehin, si phurh a sut ṭhen a, 3-2 a ni - Wolves-in beiseina thar an nei.

A tawpah erawh City laka chakna goal khungtu Eberechi Eze chu bench aṭanga lutin, chak nemnghehna goal a rawn khung leh a, Wolves tan thawhleh ngaihna a awm tawh lo.

Palace boss Oliver Glasner-a'n player ṭha ṭhenkhat hahdamtir chungin point thum an hlawh chhuak a, table-ah 12-na niin, point 52 an hmu ta - 1991-92 (57 points) season hnua point 50 an hmuh tlin leh hmasa ber a ni a, tun season zet chu Palace tan season duhawm bik a ni.