Champion ngun ber Armed Veng vawi hnih an tla

LBS Suzuki 22nd Inter Branch YMA Football-ah Lunglei Zobawk Vengthar hrem vangin tla tawh Armed Vengin nunna thar nei mah se nimin khan Serchhip Vengchung hneh loin an tla lehnghal. Chite Playground-a inkhelah Armed Veng hi ṭum hnih hma hruai mah se Serchhip Vengchungin an sut ve ve a, penalty shootout-ah Aizawl khaw pawn team hi 5-4 in an chak.

CYMA Football organising committee-in nimin chhun khan meeting pawimawh an nei a, Armed Veng hnehtu Zobawk Vengthar hi an hrem. An lehkha tihchhuahah chuan, "Zobawk Vengthar Branch vs Armed Veng Branch inkhelah Zobawk Vengthar Branch tan Zobawk Venglai Branch member T. Malsawmzuala, Z.D. Laltlansanga, T. Vanlalruata, R. Laltlanzova, C. Lalhmingmuana, V. Lalnuntluanga, T. Lalropeka, H. Lalnunsanga leh H. Zodinpuia te hian an lo khel tih hriatchhuah a ni," tiin an ziak a, an hrem chhanah Tournament Regulation, Disciplinary Rules no. 6 chhunga 6.1 a nih thu an tarlang bawk.

Zobawk Vengthar coach Lalnghawrliana Sailo chuan, "CYMA Football danah hian Voter ID leh member nih a ngai a, kan player-te hian Voter ID an neih bakah Vengthar Branch YMA member an ni. Dan ang thlapa kan khel chunga min paih thla hi hriatthiam har kan ti takzet," tiin Vanglaini a hrilh.

Inelna hi MFA leh CYMA ṭangkawpin an buatsaih an ni a, organising committee lamin inbuatsaihna pawh nei tawh lo Armed Veng chu nimin vek khan inelna an hmachhawn leh theih thu an hrilh. Vawi nga champion tawh Armed Veng hi inlan leh mah se Serchhip Vengchhung lakah an tlawm a, Serchhip Vengchung tan erawh chanchin lawmawm a ni thung.