En châkawm Lungdai Vs Armed Veng South

LBS Suzuki 22nd Inter Branch YMA Football 2025-ah vawiin aṭangin round of 16 khelh ṭan a ni dawn a, group tina pakhatna zawnna a ni tawh dawn. Group A-ah champion lai hnehtu Lungdai hnehtu leh champion rinkai zinga mi Armed Veng South te vawiin chawhnu dar 1:15 hian RG Stadium-ah an inkhel dawn.

Chawhma dar 11:00-ah Tlangpui leh Kawnpui Venglai te an inkhel dawn a, group B pakhatna zawnna a ni thung ang. Vawiin inkhela chakte hi quarterfinal-ah an inhmachhawn zui ang. Vawiin hian round of 32 khelh zawh a ni dawn a, 1st Bn MAP Ground-ah match thum a awm dawn. Champion rinkai zinga mi Durtlang pawhin chawhnu dar 2:30-ah Muthi an hmachhawn ang.

En châkawm chu

Lungdai hi football-ah sulhnu nei ṭha tia sawi tur chu an ni lo a, mahse tuna an thlen chhoh dan thlir hian team ṭha an ni tih chu a chiang. Lungdai hian New Serchhip Venglai 4-1 a hnehin bul an ṭan a, champion lai Venghnuai 7-0 in an hneh zui. Hemi hnu hian champion tawh veng pahnih Ramhlun South leh Kanan te chu penalty shootout hmangin an hneh ve ve.

Lungdai tan Diamond Harbour midfielder Lalngaihsaka chu an khaipa ber a ni a, Ngaihtea hi team tan a ṭangkai ṭhin hle. Chutihrualin penalty shootout-a ṭum hnih ngawt an chak tawh avangin Armed Veng South lamin goal an khung lawk lo a nih chuan hlauhthawnna tham a ni ve ang.

Armed Veng South hi football thiam veng ni mah se CYMA Football-ah an la champion ngai lo a, kumin hi an tan hun ṭhaah an ngai. Player ṭha rual awm khawmna an ni a; last 16 lut turin Vangtlang (3-1), Dawrpui (5-0), Keiṭum (6-2) leh Darlawng (6-2) ten an hneh a, goal khung an harsat lo. Lungdai lakah Armed Veng South tlarhmaa awm Lalnunsanga, Richard Lalramnunpuia leh J. Lalbiakliana (Valpuia) te an chet ṭhat a ṭul dawn a ni.

Tlangpui an pui

Tlangpui hi chhungkaw 147 chauh awmna khua a ni a, heti chung hian football thiam khua 16 zingah an tel. Vawiin hian chak ta lo pawh ni se, Tlangpui thlen chin a ropui tawh hrim hrim. Tlangpui hian Chhuanthar Tlangnuam 1 (2-1), Chite Veng (2-1) leh Hmunṭha (1-1 Pen 4-3) te an hneh tawh a, Kawnpui Venglai lakah beiseina sang tak an nei ang.

Kawnpui hi inkhelh thiam khua an ni a, Kawnpui Vengthar leh Kawnpui Venglai ten last 16 an lut ve ve. Kawnpui Venglai hian Ailawng (10-0), Tlungvel Vengthar (3-2), Seling (3-3 Pen 5-4) leh Hualngohmun (3-3 Pen 4-2) te an hneh. Mizoram midfielder Lalengmawia telna hi Tlangpui lakah an buk a rit zawk ang.