Bawngkawn leh Armed Veng South an chak

LBS Suzuki 22nd Inter Branch YMA Football Tournament khelh laihah, nimin khan team ṭha zinga mi Bawngkawn leh Armed Veng South te chuan an khingpui ve ve hnehin last 16 an inhlangkai.

1st Bn MAP Ground, Armed Venga inkhelah Armed Veng South hi an chesual hmasa, vawi hnih ngawt an hnufual. Darlawng tan Lalchhuansanga chuan goal hnih khungin an khua hi ṭum hnih hma a hruaipui.

Mahse, Armed Veng South hian Lalnunsanga (Talea) goal hnih bakah - Vanlalhriatrenga, Richard Lalramnunpuia, Lalhmangaihsanga leh Lalbiakliana te goal khat ṭheuh hmangin an chhanglet a, chang takin an chak leh ta zawk.

Bawngkawn pawh fiahin an awm. MS Dawngliana captain na hnuaia khel hian Reiek lakah goal hnih an chhuah a, amaherawhchu Bengaluru FC midfielder Lalremtluanga Fanai chuan goal hnihin a chhanglet a, hun harsa an tawh laiin mamawh chhanna a ni.

Nimin RG Stadium, Mualpuia inkhelah Lungdai chuan Kanan Veng chu penalty shootout hmangin 4-3 in an hneh ve thung. Lungdai hian an match hmasa berah champion lai Venghnuai an hneh a, chumi hnuah vawi hnih champion tawh Ramhlun South an pet thla leh bawk, a thiam zual 16 zinga tel phak hi an phu.

Inkhel hmuhnawm dangah Vanlalthanga hoa khel Hualngohmun leh Kawnpui Venglai an inkhel tawk takzet a, hun pangngaiah 3-3 niin penalry shootout hmangin tlang tur zawk zawn a ngai, a tawpah Kawnpui Venglai hi 4-2 in an vannei ta zawk a ni.

Hmunṭha leh Tlangpui inkhel a hmuhnawm a, khelmual chhung tluk zetin a pawn lam boruak pawh a nung ṭha, a tawpah Tlangpui an vannei. Thingtlang tlangval leh khawpui tlangval ten football an en a thuhmun vek a, a taima leh thawkrim te dinchanna khawvel a ni chho mek tih a takin kan hmu bawk.