Edmund-a'n East Bengal a zawm

Mizo winger ṭha Edmund Lalrindika chuan I League club Inter Kashi aṭangin ISL club East Bengal a zawm. Kolkata club hian Mizo tlangval la lut tur hian transfer fee-ah nuai 140 vel an senga ngaih a ni.

India aiawh pawha inlan tawh Edmund hi AIFF Elite Academy chhuak a ni a, theihna a neih san avangin Lunglei tlangval chungah beiseina pawh a sang. ISL club ṭha Bengaluru zawmin khelhna chan a harsat a, hliamin a tibuai bawk.

East Bengal-ah hian 2019–20 season khan loan hmangin a khel tawh a, match hnih inlanin, Mohun Bagan 2-1 a an hneh loh ṭumin assist a nei. Mahse, hliam vang thoin khel zui thei ta lo.

I League club thar Inter Kashi-in Edmund hi 2023–24 season khan an la lut a, hliamin a tihbuai loh avangin a theihna tak tak a lantir. Inter Kashi tana season hmasa berah match 24 khelin goal li a khung bakah assist vawi riat a nei. Season hman zawh takah pawh player pawimawh niin goal li khungin assist vawi nga a nei a, ISL club sawmtu ṭhahnem tak karah a club khelh tawhna East Bengal a thlang.

Lunglei tlangval Edmund-a chuan, "Inhliamin min tlak buak nasat avangin ISL aṭangin I league-ah ka khel a. Tunah Pathian zarah ISL-ah ka let leh dawn. Club thar tawp a ni dawn lo a, ka lo khelh tawhna a ni bawk nen, ka phurin theihtawp chhuah ka tum," tiin Vanglaini a hrilh.

Edmund hi India aiawh turin Chennaiyin forward Irfan Yadwad inhliam aiah koh a ni a, ISL club a zawm dawn bawk avangin India team-a insawhnghet turin ṭan a la ang. Blue Tigers head coach Manolo Márquez-a'n player 28 a ko a, chung zingah chuan Mizoram tlangval Lalengmawia Ralte, Lallianzuala Chhangte leh Ayush Dev Chhetri te an tel a, Edmund hian zawm ve bawkin nimin aṭang khan Kolkata-ah training an ṭan a ni.