Champions League khel tur a la chiang lo!

Premier League-ah season thara Champions League khel tur a la chiang kim thei lo - Zirtawpni zan khan Aston Villa leh Chelsea an chak a, season thara UCL khelh an tumna chu an chhi nung zel.

Club pahnihin an hnehte maw? E le, Europa League final khel tur Tottenham Hotspur leh Manchester United mawle! Club pahnih hian league lamah chak an tum tawh lo em ni chu aw, tih mai tur a ni.

Villa hian an mikhual Spurs chu 2-0 in an hneh a, Ezri Konsa leh Boubacar Kamara ten goal khat ve ve khungin, London club hian a chhanletna tur an neih loh avangin an tlawm.

Chelsea-in an mikhual Manchester United chu 1-0 in an hneh thung a, Marc Cucurella chuan inkhela goal awmchhun a khung - Blues leh Villa ten point 66 ve ve hmuin, top five huangah an awm mek.

Villa beiseina

Unai Emery hnuaia league match 100 an khelhnaah Villa-in inkhel thunun mah se, beisei angin goal an khung lawk thei lo a, Morgan Rodgers, Watkins leh Marco Asensio ten an chance neih an chhawr thei lo vek!

Mahse, second half-ah Villa vanneihna a her chhuak ta nge nge. John McGinn-a corner aṭanga ball kal chu Ollie Watkins chuan Ezri Konsa ke bulah tauh thlain, Konsa hian chiang zetin goal-ah a chantir.

Villa-in an duhtawk mai lo - minute 73-naah Kamara inlarin, Premier League-a a goal hmasa ber a khung a, Villa chak a nemnghet. Spurs erawh an league match hnuhnung 11-ah vawi khat chiah an la chak!

Spurs tana chanchin lawmawm erawh captain Son Heung-Min a dam ta chu a ni a, a chance neih a chhawr thei lo thung. Hetihlai hian hliam ngah tak Spurs midfielder Pape Sarr chu lakchhuah a ngai a, Tottenham boss Ange Postecoglou chuan, "Hlauhthawnawm a ni lo," tiin inven nana lachhuak a nih thu a sawi.

United ngamtu Chelsea

Manchester United chak loh hi 'news' a tling tawh lo a, thil thlen dan pangngai ve reng a ni e! United-in Nilaini zanah Europa League final khel dawn mah se, United manager Ruben Amorim-a'n an ṭhat dan berin squad a rem.

Harry Maguire-a'n goal a khungah inngai mah se, video assistant referee (VAR) hmanga en a nih hnuah offside vangin pawm a ni lo. Blues tan Reece James-a'n post a pet per a, second half-ah penalty an hlawh chhuakah an inngai bawk.

Mahse, Andre Onana-a'n Tyrique George a titlua a lan avanga referee-in penalty a pek chu, VAR hmanga ennawn a nih hnuah sut a ni - a tawpah erawh James-a ball pek ṭha zet chu Cucurella chuan goal-ah a chantir a, point thum hlawhchhuah nan a tawk.

Chelsea hian anmahni ang thoa UCL beisei Nottingham Forest chu May 25, Pathianni zanah an hmachhawn ang a, an league match hnuhnung berah hian an chak chuan season tharah UCL an khel ang.