Real Madrid an chak hram

Nilaini zan La Liga inkhelah Real Madrid chuan 2-1 in Real Mallorca an hneh a, chak zo lo se Barcelona chu champion mai tawh tur an nih laiin, Catalan club champion hun an pawt khawtlai hret.

Santiago Bernabeu-a inkhelah Mallorca hian Martin Valjent hmangin goal hmahruai an khung a, Real-in second half-ah Kylian Mbappe hmangin si phurh an sut thei hram.

Mahse, Madrid khaw club hian goal dang khung an harsat zui a, team pahnih hian point an insem mai dawn niin a lang hman. Mahse, Jacobo Ramon hmangin hun pek belhah goal an khung leh a, 2-1 in an chak daih.

Barca champion hun an tikhawtlai hret a, mahse, he thuziak i chhiar meuh chuan Barca hi an champion der tawh mai thei - nizan khan Espanyol an hmachhawn a, an result kan hre hman lo. An chak chuan an champion ang.

Beisei loh lam

Bernabeu-ah mikhual Real Mallorca zawkin goal an khung hma a, minute 11-na lekah Valjent chuan goal hmahruai khungin Real a barakhaih. Madrid-in si phurh sut tumin, na takin an nawr let zui a, mahse, an vanneih zan a ni lo.

Mallorca goalkeeper Leo Román chu hmuhnawm khawpin a khel ṭha a, vawi 11 zet save a nei hem mai! Mahse, Real hi dan reng theih erawh an ni lo a, minute 68-naah Kylian Mbappe inlarin, French striker hian tun season-a a goal 40-na a khung - season khatnaah a tlangnel nghal hle.

Mbappe hian Real tana heti zat goal khung tur hian match 54 chiah a mamawh. Kum 26 mi striker hian league bikah goal 28 a khungna chiah niin, Real tana season khatnaa heti zat goal khung thei hmasa ber a ni.

France captain hian kum 72 zet Alfredo Di Stefano (27 goals) record lo ding tawh chu a khum a, goal 40 a khung pawh Real tana season khatnaa goal khung hnem ber record a ni - kum 32 liam taa Ivan Zamorano record (39 goals) chu a khum.

A tawpah Madrid

Real hian 72% zet ball changin, vawi 39 ngawt shot an nei a, mahse, an vannei hleithei lo. Point an insem mai dawna a lan tawh hnuah Ramon a inlar a, Real tana vawi hnih a inlannaah goal a khung nghal.

Mallorca tan si phurh sut leh turin hun a awm tawh lo a, Real-in 2-1 in hnehna an chang. Madrid khaw club hi chak hram mah se, player inhliam an ngah a, an ṭhat dan berin an inlan lo.

Nilaini zana Mallorca an mikhual hma lawk hian Brahim Díaz leh Andriy Lunin inhliam thu an hriat belh a, player pahnih an inhliam chiah hian Real hian first team player 11 chiah chhawr theih an nei!

Real player zingah Dani Carvajal, Éder Militão, David Alaba, Antonio Rüdiger, Ferland Mendy, Eduardo Camavinga, Lucas Vázquez, Vinícius Júnior leh Rodrygo te an inhliam vek a, hrem vangin Aurélien Tchouaméni a inlan thei lo bawk.

Inlan hram Real!

Diaz leh Lunin an inhliam belh a, Rodrygo chu damlohna avangin a la inlan thei lo bawk. Ningani zanah hian Real-in first team player Thibaut Courtois, Fran García, Federico Valverde, Jesús Vallejo, Luka Modric, Dani Ceballos, Arda Güler, Jude Bellingham, Endrick leh Mbappé te chiah an nei!

A bak zawng chu reserve team aṭanga telh an ni a, La Liga danah first eleven-a first team player paruk aia tlem an awm chuan inkhel chu tihtawp theih a ni hial - heti chung hian Real an inlan a, a tawpah chuan an chak.

Real boss Carlo Ancelotti chuan, "Kan nauten an khel ṭha takzet. Theihtawp chhuahin an bei a, rim takin an thawk a, a tawpah chuan kan phu ang ngeiin hnehna kan chang ta a ni," a ti.

Italian coach chuan sawi zawmin, "Kan chak avangin kan lawm a, duhawm taka season khar kan duh. Inkhel ṭantirah bul ṭan ṭha lo mah ila, ṭha takin a tawp kan khar," a ti a, an khelh danah a lawm thu a sawi.