Zheng lakah Sabalenka a tlawm

Zheng Qinwen chuan tunhma lama a la tih theih ngai loh tiin Aryna Sabalenka a hneh ta. Chinese nula hian Italian Open khelh laiah semifinal a lut a, final thleng tur chuan Coco Gauff a paltlang leh a ngai dawn a ni.

Nilaini zan quarterfinal inkhelah, Olympic champion Zheng hian 6-4, 6-3 in hnehna a chang. Tun hma lamin Sabalenka nen hian an intawn hmasa parukah Zheng hi a chak lo vek, tunah erawh thawnthu a ziak danglam.

Kum 22 mi Zheng chuan, "Hun rei tak chhung chu ka khel ṭha tawk lo a, tunah chuan semifinal ka thleng ve leh ta. Sabalenka nen a nih kha chuan chak lo zawk tura ngaih ka ni, mahse ka chak ta si hi ka tan chuan chanchin lawmawm a ni," a ti.

Inkhel dangah Gauff chuan Mirra Andreeva chu 6-4, 7-6 (7-5) in a hneh ve bawk a, a match hmasa lamah Emma Raducanu a lo hneh tawh bawk, champion tura rinkai Gauff hian Zheng lakah fiahna a hmachhawn ang.