Jonathan David-a'n Lille a chhuahsan dawn

Lille striker chhuanvawr Jonathan David chuan season tawpah French club hi a chhuahsan tur thu a sawi a, amah duhtu nia sawi Premier League club ṭhenkhat tan rimawi a tling ang.

Kum 25 mi striker hian Lille-ah season tawp thleng bak contract a nei tawh lo a, nipui transfer-a la lut theitu tur club chuan a thlawnin an la lut thei dawn tihna a ni a, an inchuh na khawpin a rinawm.

Jonathan David chuan, "Eng thawnthu pawh hian bul ṭanna leh tawpna a nei ṭhin. Hun engemaw chen he club-a ka awm hnuin, 'Mangṭha' tia inthlah a ṭul ve dawn ta," a ti.

Canada international Jonathan David hian Belgian Pro League club Gent aṭangin a professional zinkawng a zawh ṭan a, season hnih a khelh hnuin, kum 2020 khan Lille hi a zawm.

Season nga a khelh chhungin Ligue 1 leh Trophée des Champions-ah nomawi a chawipui a, match 231-ah goal 109 ngawt khungsak hmanin, assist vawi 30 a nei.

Tun season-ah David hian inelna hrang hrangah match 48 khelin goal 25 a khung a, assist vawi 12 a nei. May 18, Pathianni zan hian Reims an lenchilh ang a, tun season-a an match hnuhnung ber tur a ni nghal ang.

Canada tan vawi 61 inlana goal 32 khungtu hi Liverpool, Chelsea, Manchester United leh West Ham ten lakluh an duh nia sawi a ni a, nipui transfer tingaihnawm tur zingah a tel.