AC Milan hnehin Bologna an champion

Bologna chuan kum 1974 hnuah nomawi an chawi ve leh ta - Nilaini zan khan Bologna hian team ṭha zawka ngaih AC Milan chu 1-0 a hnehin Coppa Italia nomawi a chawi.

Stadio Olimpico-a inkhelah team pahnih an inveng tawn hle a, second half minute 53-naah Bologna tan forward Dan Ndoye chuan goal awmchhun a khung - box chhunga a ball chan chu inringtawk takin a insiamrem pui a, a duh anga hmunawl a neih hnuah chiang zetin a khung.

Milan lamin na takin goal an nawr a, mahse Bologna goalkeeper Lukasz Skorupski an ngam lo - Skorupski hian a zawnin Luka Jovic khung tur chu a dansak, an champion theih chhan langsar a ni bawk.

Bologna hian kum 51 chhung tehmeuh chu nomawi lian tham chawi an nei lo, an tan chuan chanchin lawmawm bik a ni. Coach Vincenzo Italiano tan pawh hun chhinchhiah tlak bik a ni ang.

Vincenzo Italiano hian tun hmain Fiorentina a enkawl ṭhin a, final vawi thum khel tawhin an chak lo vek. Italiano chuan, "Ka naute hian champion an phu, tournament ṭha takin an khel a, a bik takin final an khel ṭha hle.

"Min ṭantute hian kan chak theih nan an thawhhlawk em em bawk a, an phu ang ngeia nomawi kan hlawh chhuahsak hi a lawmawm takzet a, kan sulhnu hi hriatreng a ni tawh ang," tiin a sawi.

Nikum nipuii bazar lai khan Italiano hian Thiago Motta a thlak a, ani hian Juventus a zawm thung. Old Lady hi beiseina sang tak nen zawm mah se a chet ṭhat pui lo a, kumin March thla khan Motta hi an ban leh tawh a ni.

Kum 2008 hnu lamah - Juventus, Inter Milan, Napoli leh Lazio ten Italian Cup hi an insem vek a, midang tan kawng an hawnsak lo. Tun season-ah erawh thawnthu a danglam a, champion thar an awm.

Milan manager Sergio Conceicao chuan, "Tunah hian sawi tur tam tak ka nei, kan tih ṭhat tawk lohna leh chet fuh deuhna lai pawh sawi tur ka ngah a, mahse sawi vek hun pawh a ni hran lo.

"Goal kan khung theihna turin ruahmanna hrang hrang kan siam a, mahse chung zawng zawng chu a hlawhtling lo vek. Kan dinhmun a derthawn phah em chu ka hre lo, mahse ka hmabaka a hna awm chu ka thawk zel ang," a ti.

Coppa Italian an champion avangin Bologna hian season tharah chuan Europa League an khel dawn a, Serie A lama an dinhmun avangin AC Milan pawhin European football inelna sang pahnihna hi an khel ve bawk ang.