Celtics beiseina a nung

Boston Celtics chu an la tlawm mai duh lo - nimin zing khan Celtics hian New York Knicks chu 127-102 in an hneh a, best of seven series an khelh laiah Celtics hi 3-2 in an la hniam zawk.

Celtics beiseina a nun lai hian Golden State Warriors erawh an zinkawng a tawp fel ta thung - Minnesota Timberwolves chuan Warriors chu 121-110 in an hneh a, Western Conference series chu 4-1 in an la.

TD Garden-a inkhelah Celtics thiampuipa Jayson Tatum chu hliam vangin a inlan thei lo a, an player ṭha inlan lo mah se Derrick White chuan point 34 a nei a, point 26 neitu Jaylen Brown a khel ṭha hle bawk.

Celtics coach Joe Mazzulla chuan, "Match dang khelh chhunzawm leh turin beiseina kan la nei a, chu beiseina meichher mit mai tur chu player-ten an chhem nung zel a, a tawp thlengin kan ṭang tlang dawn a ni," a ti.

May 17, Inrinni zing dar 5:30 hian game 6 an khel leh dawn a, Celtics hi an chak leh a nih chuan game 7 khelh chhunzawm a ngai dawn a, an chak lo a nih erawh chuan Knicks an tlang ang.

Golden State Warriors an che hleithei lo - hliam vangin Stephen Curry a la khel thei bawk si lo a, ani hial mual sir aṭangin a ṭhiante inkhel a lo en. Warriors coach Steve Kerr chuan, "Hliam hi chu infiama in a ken tel a ni tih chu kan hriat a ngai.

"A bik takin playoff lai hian hliam an tam ṭhin, inhnaih tak takin match khelh a ngai ṭhin a, a nghawng a na thei hle. Kan chak loh avangin chhuanlam siam ka tum lo, kan khingpui Minnesota Timberwolves khan chak phu khawpin an khel ṭha a, kan fak mai tur a ni," tiin a sawi.