Champion lai Zverev zinkawng a tawp

Italian Open khelh mekah, champion lai Alexander Zverev chu Lorenzo Musetti hneh loin quarterfinal-ah a tla a, hetih lai hian Carlos Alcaraz erawhin semifinal a in vaw kai thung.

Nimin zing lam inkhelah seeded pahnihna Zverev hi chak tura rinkai zawk a ni a, mahse rinlawk ang ngawtin thil a kal bik lo. Tualchhung tlangval Musetti-a'n amah ṭantu thawm na takte hmaah 7-6(1), 6-4 in hnehna a chang a ni.

Musetti hian hnehna chang turin darkar hnih leh minute 15 chhung hun a hmang a, player pahnih te hi clay court chunga inkhelh nuamti an nih bakah tharum an hmang nasa, a tawpah Musetti a vannei ta zawk.

Italian player Musetti chuan, "Stadium khat tlatin inkhel entu an awm a, chuang mite chuan min thlawp ṭha em em bawk, ka tan chuan chakna hnar pawimawh tak an ni," tiin a sawi.

Italian Open khelh laiah Musetti hi seeded pariatna a ni a, clay court inelna lian French Open an khelh hunah pawh seeded pariatna a ni phak dawn tih a chiang tawh, atan chuan chanchin lawmawm a ni ang.

Inkhel dangah Carlos Alcaraz chuan Jack Draper chu 6-4, 6-4 in a hneh - British tlangval Draper hi player ṭha zinga mi ni mah se Alcaraz lakah chuan a ruh a no zawk a, hun pawimawh laiah a chesual zawkah a ṭan zel avangin a chak lo.

Spanish star Alcaraz chuan, "Rei tak tak ball in pek kual a ngaih hi chuan a harsa ṭhin a, chutiang a thlen loh nan chuan theihtawp ka chhuah. Ka tan chuan Rome khawpui hi hmun ṭha a nih chhoh zel ka beisei bakw," tiin a sawi.

Italian Ope bikah chuan Alcaraz hian tun hmain semifinal a la thleng ngai lo, kuminah bung thar kaiin Musetti nen final luh an inchuh ang.