Bawngkawn, Khawzawl Zuchhip, Electric Veng te inlan dawn

LBS Suzuki CYMA Football-ah vawiin hian team vantlang chunglama ngaih Bawngkawn, Khawzawl Zuchhip leh Electric Veng te an inlan dawn. 1st Bn MAP Ground, Armed Veng-a match hmasa berah Bawngkawn leh Darlung te an inkhel ang.

Bawngkawn hian Nilaini mai khan Muallungthuah Kawnpui Bangla Veng 3-0 in an hneh a, MS Dawngliana'n hattrick a siam. Ni khat chauh hahdamna hun an nei a, vawiin chawhma dar 10:00-ah Darlung an hmachhawn lehnghal dawn. Tuirial 5-2 a hnehtu Darlung erawh kar khat chhung an chawl a, team panngai tak an nih bawk avangin Bawngkawn tan chetsual theih a ni ang.

Tlai dar 2:30-ah Khawzawl Zuchhip pawh an Branch president Robert Lalthlamuana hoin result ṭha neih an duh a, Mizo trio zinga mi Vanlalrova chu coach atan an la lut. Zuchhip hian East Bengal player Vanlalpeka Guite an kawl a, match hmasa berah LPS Cup champion Sihphir Venghlun an hneh. Chutihrualin an khingpui tur Saitual Venglai hi an pangngai ve tho a, chak tur a chiang lo.

Vawi thum champion tawh Electric Vengin bul an ṭan ṭha a, Muanna Veng 11-0 in an sawp. Vawiin chawhma dar 10:00 hian Chite Playground-ah Ṭhiak an hmachhawn dawn a, hna harsa tur awmin a lang lo. Ṭhiak ho tan senior player Lalbiakhlua (Biaktea) leh Lalhlimpuia (Tata) te dan a la harsa deuh ang.