Nunez-a hremna kaltlangpui dawn

Liverpool striker Darwin Nunez chu international football-a hrem a nih mekna chu kaltlangpui a ni dawn. Urguayan striker hi ram tana a inlanna lamah thubuai a nei a, hei hi Court of Arbitration for Sport (CAS) chuan kaltlangpui turin thu a titlu.

July 2024 khan Copa America semifinal-ah Uruguay leh Colombia inkhelin, Charlotte khawpuia inkhelah Uruguay hi 1-0 in an tlawm. Inkhelh zawhah buaina a chhuak a, Nunez hi fan-te zinga tlan chho a, tharum thawhtu player zingah a tel.

Heng thil thleng avang hian South American football-a thuneitu sang ber CONMEBOL chuan Nunez leh player dang chu August 2024 khan a hrem a, Reds striker hi international football-ah match nga khel thei lo tura an tihbakah £15,145 an chawitir.

Nunez bakah hian Tottenham midfielder Rodrigo Bentancur chu match li atan hrem niin, Napoli defender Mathias Olivera, Barcelona defender Ronald Araujo leh Atletico Madrid defender Jose Maria Gimenez te chu match thum ṭheuh khel thei lo turin hrem an ni bawk.

Uruguay Football Association chuan an player-te hremna hi an khinglet a, an player-te chu mahni sahimna tur ngaihtuaha che an nih thu an sawi a, an hremna chu tihtawi emaw tihtawpsak an ngen.

CAS chuan an chhui chian chhung chu player-te hi ram tana inlan an phalsak zui. Mahse, CAS chuan thil thlen dante a zirchian hnuah, hremna chu kaltlangpui turin a ti ta a ni. CAS chuan, "Panel chuan uluk taka thil thlen dan a zirchian hnuin, player-te hi mahni sahimna tura hetianga che hi an niah a ngai lo a ni.

"Mahni duhthu renga tharum thawha che an ni a, hei hian CONMEBOL kaihhruaina dan chu a bawhchhia a ni," an ti - CAS-in a chhui hmaa match hnih hremna lo tuar hman tawh Nunez hian World Cup qualifier-a Paraguay, Venezuela leh Peru an hmachhawn hunah ram tan a khel thei dawn lo tihna a ni.

Uruguay leh Colombia inkhelh ṭum hian Uruguay players chhungte ṭhutna lamah buaina a chhuak a, Nunez hi railing-ah lawn liamin, fans awmna lamah a tlan chho a, tharum thawhin a che zui.

Inkhel hi a hmunah mipui 70,000 chuangin an en a, heng zinga 90% chu Colombia ṭantu an ni, an ti. Uruguay captain Gimenez chuan, "Police pakhatmah an awm lo a, kan chhungte venhim nan khatianga kan chet kha a ngai.

"Mi pahnih, pathum zu rui, in dan chin tawk hre lote chet dan avanga buaina chhuak a ni," tiin a hnuah a sawi zui.

Uruguay boss Marcelo Bielsa chuan Colombia fan-te chu a player-te laka ngaihdam dil turin a lo phut hial tawh a, Argentine coach chuan, "Engvangin nge i nu, i unaunu leh nunaute venhim chu i tih loh bik ang? Ka player-te khan an chhungte venghim lo se, kan dem zawk hial ang chu," a ti a, a player-te a chhan tlat.

Kum 25 mi Nunez-a boruak tawn a fuh hleithei meuh lo a ni ber. Liverpool striker hian a club chu tun season-ah league nomawi chawipui mah se, mimal takin beisei a phak lo a, tun season-a match 45 a khelhah goal sarih chiah khungin assist vawi sarih a nei - club danga chhuak tur anga sawi thawm a awm mek.