Armed Veng khingpui tur Saidan Kolasib

LBS Suzuki 22nd Inter Branch YMA Football Tournament-ah vawiin hian vawi nga champion tawh Armed Veng an inlan leh dawn a, chhun dar 12:15 hian Chite Veng Playground-ah Saidan Kolasib nen an inkhel dawn.

Armed Veng hian match hmasa berah Zemabawk 2-1 in an lehthal a, second round lut turin vanneihna an mamawh tel. Lalramchullova kaihhruai team tan vawiin lamah hna a awlsam hret tura ngaih a ni a, mah se Saidan Kolasib hian training-na hmun an neih ṭhat avangin fimkhur erawh a ṭul ang.

Zemabawk an hneh ṭumin Lalawmpuia Hnamte-in red card a hmuh avangin vawiinah a inlan thei dawn lo a, chutihrualin an innghahna Zodingliana Tochhawng, Lalfakzuala leh Lalbiakhlua te an dam ṭha. Armed Veng hian champion beiseiawm zinga mi an ni tih lantir nan nuam sa taka Saidan Kolasib hneh an tum ang.

Chite Veng Playground-ah Kolasib team ṭha zawka ngaih New Diakkawn pawh an inlan dawn a, Mizoram pawn aṭanga team tel Cachar Zaite an hmachhawn dawn avangin hna harsa tur awmin a lang lo. Match tawp berah Khawbel leh Durtlang Leitan te an inkhel dawn a, an intluk tawk viau tura ngaih an ni.